To 35樓 蓄芳兄
哇,乜咁有心呀,我打幾隻字,你覆成千幾兩千字,果然係湧泉以報!
咁我都唔能够苟且,要認真回覆蓄芳兄先得.
哈哈，刀兄果然係有心人！
哈哈，邊夠你有心呢！
坦白講，關於大灣區，落注就冇喇，但都真係有上去望過幾眼。冇去打搞刀兄，怕你話我搞搞震冇幫襯，哈哈！
依傢大灣區一綫二綫大部份限購限外，邊有得你幫襯？一係要居住證，一係要開公司，蓄芳兄繼續搞搞震吧。
走馬看花，所見所聽所聞，小小分享如下：
(只係以香港人可以朝朝返到香港工作嘅深圳為例）
加咗呢個條款，根本就唔係投資大灣區，應該叫做“深圳睇樓”，廿年前果隻。深圳咁嘅樓價，依傢先至去？
1）大陸樓殘得好快，十五年過後嗰啲，都幾難睇得上眼。其中一個原因，係管理差，原來大部份都冇業主立案法團，想換管理公司，難過登天。
你明顯手上冇D大陸嘅靚位
開頭新樓未買晒，燈火通明，但一買晒之後，話知你光管壞、笠壞，一於關人隱事，但管理費就照收。夜晚大堂、走廊黑過鬼，d磚爆哂起哂都冇人理。
呢D祗係你嘅期待啫，就算去到三四五綫城市都完全唔係咁，你估大灣區D業主係生番？定係吸血僵屍？哈哈哈
2）如果要做按揭，利息貴，係香港嘅兩三倍。
兩倍，四五厘，但係好多地方單價係香港五至十分之一。
3）使用年限，只有40年至70年不等，仲唔保證有冇得續期。我個人相信有，但冇人會話到俾你知有冇，話有嗰個都係吹水。
點解大陸樓嘅使用年期咁短呢，我諗係大部份人都相信，層樓捱唔到50年。
香港地契剩低30年唔到，你都唔驚，14億人嘅物業仲有40－70年，你反而驚？續唔續期係睇俾幾錢啫。捱唔捱到50年？磚屋都唔止喇，有點危言聳聽，哈哈哈。
4）樓宇品種繁多，好易唔小心就賴嘢，又紅本又乜本，唔同品種有唔同限制，買之前真係一定要搞清楚。
何來繁多？買就買商品房，依傢新證就係一本過，去得房管所，邊有咁多嘢你瀬呢？
5）大部份AA誠信有問題，信佢一成，雙目失明，不如直接去搵刀兄幫手好過。
我唔係AA，會介紹筍盤，但係唔會幚你跑，所以做嘢要搵真正嘅AA，至于誠信，無需理會，有操守就夠。咁怕就搵大行，比如鏈家、中原、世聯之類，不過我未幫襯過佢地，買親都係細行做嘅，未有過任何不愉快。大爺，幾十歲人唔係細路呀。
好多AA都唔熟例，亂吹一通，淨係識講過去兩三年升咗幾倍，跟住落來一兩年仲會升多幾多幾多，單一模式氹你買。
你咁講小心得罪埋香港D AA喎。
單刁一完，你有事想搵佢幫手都幾難。如果不幸交易出現問題，你去投訴，佢間公司會話係AA個人問題，公司唔負責，同埋個AA前日已經辭職，公司都搵緊佢。佢會同你報埋公安，但都係得個報字。
你唔止係詆毀AA，仲係歧視大陸人，難道蓄芳兄見親D大陸人都係咁？
更重要一點，係“單刁一完”，所謂完係交易完成，同埋中介服務完成，之後仲會有咩事搵AA？過去幫我做過嘢嘅AA，個個都做咗friend。
香港AA都有害群之馬，但情況一定冇咁嚴重。
咁驚可以搵大行。
6）大陸唔興活化或重建舊區，睇羅湖區就知，揸住只有等老化，唔升值或者賣唔出都幾頭痕，當然自住當交租就冇所謂啦。
大陸舊區重建係好普遍，最緊要塊地值錢就得嘞。
不過..........
住得好好地，無啦啦點解要重建？點解你話大陸樓會又唔升值又賣唔出嘅？唔通香港樓賣唔出（比如97－2003）就唔頭痕？
大陸有新城區同舊城區之分， 20年左右，新城區就會變左舊城區，然後喺第二個地方又會出現新城區，舊城區就等死。冇得搏清拆，搏清拆基本上輸硬！清拆重建呢d國家機密，幾時會輪到你執寶吖，所以唔好諗。
我20年前買嘅第一件貨，依傢靚咗十倍，做咗地標喇。原來你買70年年期嘅樓嚟博重建？好難明。
7）睇完幾個口岸區嘅樓，發現喺樓價上，屯門、元朗仲平過深圳。你買得起佢嘅呎價，但你未必買得起佢嘅尺數。所以香港人唔好再發夢，以為自己可以撤退返去幾個口岸區生活，然後香港返工。而家深圳灣新少少嘅樓，呎價都港紙2萬以上。
原來深圳呎價2萬以上？依傢大灣區仲有好多呎價1千以下喎，車程就差半粒鐘左右，咁係咪好抵買？
如果睇大灣區嘅眼光仲停留喺深圳幾個口岸，咁向飯批得你冇錯，眼光停留喺十年前。難道蓄芳兄冇留意近排鬧得沸沸揚揚嘅一地兩檢？車程48分鐘唔係講深圳，而係廣州南站，再轉車48分鐘，就去到汕頭喇，到時請你去打冷，ok？
深圳都諗唔掂，何況大灣區其他地方？你真係唔使返工？所以除左退休養老，我看唔到大灣區嘅價值。投資搏升值？政策市，唔升點算？租金又遠遠cover唔到。
你當然係“看唔到大灣區嘅價值”喇，由我開始日日唱大灣，到依傢升倍幾喇，我淨係知道依傢香港嘅樓價，勉强買得起果班人，唔止供得陰功，住得更陰功，就快連棉胎都要年年換喇。
但我要補充一句，租就真係好抵租，特別係新樓，靚嗰隻，真係黃豆嘅價錢，星級嘅享受。
你講曾蔭權？還是講ABNB？
不過如果求住，屯門元朗點都方便過深圳呱，如果budget 有限，諗吓d二手居屋好過。我老友地產A話，實用面積六七百呎嘅三房，白表都係六球左右。
六七百呎屋喺大灣區好多唔使100萬，六球港紙，可以喺容桂買4000幾呎復式一綫望江，仲唔限購呀..........
8）今日人仔貴，你衝個頭埋去，但長遠而言人仔係要貶值，呢個因素必須喺考慮入面。
當然，小弟都係聽財金專家預測先至話人仔長遠會貶值啫，會升都唔出奇，到時就會係另一個故事。
既然唔知人仔升跌，咁點解叫人淨係考慮人仔跌？係咪偏頗得太明顯？
以上係小弟走馬看花所得嘅少少片面之詞，專業意見當然係要請教刀兄啦。刀兄有請，可以請指點指點要在香港返工但迷失嘅一群嗎？
我都唔係專業丫，“要在香港返工但迷失嘅一群”，瞓緊街嘅就唔好考慮大灣區嘞，有地方住而又嫌細，想改善往後幾十年生活質量，嗱嗱林搵D大陸有樓嘅friend帶路，香港依傢常留廣東省嘅人超過五十萬，總有一個喺身邊。辦居住證同睇樓，睇得嚟就啱嘅嘞。
例如港元最優惠利率（
