香港樓市喺 1946年開始，小市民先叫做有得玩，加上同期香港經濟開始起飛，所以樓年升到 1965年文化大革命嗰陣先叫停，樓牛宣佈釘蓋，為時 19年命仔！
直至 1967年香港大暴動，有錢人雞飛狗走，樓市直插谷底，要到 1968年先見底回升，熊市為期三年！
去到 1973年香港發生股災，恆指由千七點去到 150點，樓市當然同步下跌，但在1975年已開始反覆上升，直到1981年中英就香港前途開始角力，另一批人又開始走夾唔唞，有錢人成條街咁來出貨，然後去移民，所以呢次牛市應由 68 – 81 年計數，總計為期十三年。
直至 1984 年香港前途漸露端倪，樓市止跌回升，呢次熊市為期都係三年！
之後香港經過 64事件及 1992年宏觀調控影响，但同期樓市都係大漲少回，直到九七年，呢次牛市應由 84 – 97 年算數，總計為期又係 13年！
出得黎行，遲早要還，之前你升得甘，呢次亦要跌得甘！所以呢劑要 6年時間療傷，直到 2003年整個解脫式下跌俾你嘆先止得咳！
由 2003年開始，直到 2008年海嘯咁大件事，都整唔停嗰市，究竟係點解？
因為未夠鐘落堂嗎！
有數計：- 2003 年加 13 年係 2016 年，還有四年你 CY 嘆，真係有排你頭痕！
都唔知究竟佢爭個特首位來做乜？搏俾人圍插？ ？
CY 實施咗 SSD 加辣及 BSD 之後，購買力肯定收縮起來，但同時亦令二手盤嘅供應更加短缺。
08 年尾到 11 年中，新做樓宇按揭有 H +0.65到0.75厘嘅優惠，連轉按都可同樣食這免費午餐，如果呢兩年幾供樓唔選擇做 H 按，這位人兄數學肯定好水皮，而空置率得幾個 %，揾租客亦唔難，當每月收完租扣晒按揭、差地管之後仲有銀落袋，請問聲呢班業主有乜誘因去賣樓呢？！
11 年尾到現在，實施咗SSD，如非必要或賺到笑，又請問聲有何動機去賣樓？！
香港現在有5類人，第一類有資產過億，而且負債比率好低，政府理論上可以當佢哋無到。
第二類有資產千多萬，負債比率五成樓下，理論上政府都可以唔使理佢哋。
第三類資產淨值百零二百萬，但負債比率係七成樓上，咁政府做嘢前就要睇環境。
第四類就係無殼一羣，仲每個月捱緊貴租，咁基於政治需要，政府唔睇佢哋都唔得。
最後就係接受緊政府房屋資助嘅公屋居民，佢地理論上唔使你理佢哋住，或遲啲先攪都得。
經97樓災一役，投資者保守咗好多，如果樓市跌一半他們非但無損無爛，隨時執平貨都得，而就來供甩層樓嘅人都無事，一個語該升呢細換大都似，咁邊個負責埋單，俾人執平貨呢？還要問仲要審！咪第三類人做慘劇主角囉！
但講時講，樓巿大跌5成，四五類人應該嚇到瀨尿，或做咗量地官，夠膽入巿者應少得可憐，政府最終做完一場六國大封相，啲錢又係俾第一及二類人賺走曬，第三類人唔清袋都叫執倒，而第四及五類一樣繼續無殻。
要是政府人為地整冧個市，對第三類市民影響最深，但對第四五類市民幇助不大，而對第一二類隨時有著數，政府點攪玩?答案好明顯。
乜嘢係正常價錢?唔同人有唔同睇法及標準，如果大家都認同一個價格指數，喺某個位係正常嘅，咁買家會買；賣家會賣嗎?
價格狂起暴跌，邊個最開心? 唔該睇睇香港最有嗰班點發大達，李嘉城在遍地炸彈之時反而狂入地皮以及地底泥價嘅資產，代表作緊係從匯豐手上平價買入和黃控制權，再襯置地周身唔掂之時買入港燈。
郭得勝亦係從置地手上平價買入中半山土地庫，其中帝景園更是日後新地作品共同參照之對象。
炒家可改變短期走勢，但對長遠走向影響力好細。我一年前喺呢度講過，主導香港樓市嘅係政府及銀行，政府如果唔係批出土地使用權時，唔係用價高者得：銀行如果唔係將估價步步高升揾客，樓巿又點會升到天咁高?
現在香港點解仲有人喺呢個位入巿買樓，除一部份係自用客之外，但嗰啲唔信印刷出來嘅投資產品，情願高追磚頭嘅人亦唔少。
我強調我都希望個巿回少少，等CY有下台階，但巿埸唔到我哋話事。
政府樓房政策越收緊，小業主越驚賣咗買唔翻，咁就越唔敢放手，形成惡性循環。
