【珍惜香港】記得上次，
環球經濟新常態之續，寫到
最後一篇，提到香港嘅人口，
逐漸老化，好多物業持份者，都已經上咗年紀；佢地封印住嘅物業，亦佔市場總貨量一個
非常可觀嘅部份。而基於
人望高處，水向低流呢個市場本性，矛頭，最終都會指向呢個龐大嘅社群。要拆解呢個局，當時曾經閃過一個概念，但呢個預測，前衛到連我自己都未可以接受，結果都喺冇寫到。
上星期，博士出咗篇嘢話，
學生唔應該做包租公，又令我回想起果件事。今日博士再出文跟進，咁我就視之為緣，同大家分享一下。
早响一年前，
我回應姚博士，對於佢提議政府從市場
租入大批物業，轉租俾有需要家庭嘅睇法，話喺審慎正面。
正面，喺因為呢個
雙贏辦法，唔屬於
撐此打彼嘅消極手段；
審慎，就因為由政府操刀，執行上會面對好多問題，官僚機構喺好難有效處理。其實，果陣對
「包租」或會成為
趨勢呢個概念，已經有個雛形。
宏觀上，香港作為一個
成熟嘅經濟體，好多嘢，
透明化、規範化、企業化，已經喺大勢所趨。依家生意難做咗，而向上游嘅機會同形式，亦已經大不如前。
小企業難以生存，
大企業亦要薄利多銷；而市民亦會喪失好多低風險高回報嘅投資機會。
收租佬呢個行業，會唔會面對同一命運？
「漂樂居」之事，又令我諗起一年前，同大家分享過
內地來港留學生夾租嘅經驗，當時我話，
收租佬，只喺一個
服務性行業。當市場上嘅物業持份者，年紀越嚟越大，再加上將來政府對收租佬嘅政策，就算唔收緊，亦唔會放鬆，佢地未必仲有心力，去應付收租呢個行業。至於佢地嘅下一代，個江山又唔喺自己打番嚟，有力唔代表有心。到最後，倒不如花啲
固定成本，交俾人打理。
咁
「包租」呢個行業，將來會唔會大行其道，
甚至走向企業化？
有求就有供，要發生嘅，始終都會發生。
暑假已經過咗一半，如我所料，我租俾內地來港留學生嘅物業，又好順利咁轉租咗俾
佢地介紹嘅師弟師妹啦！唔使經地代，仲加埋租添。原來，經過多年發展，佢地已經有個聯網，
互相介紹搵樓夾租。作為收租嘅前線，我見到嘅市場，喺好真實；有啲人，否定
剛需，我認為喺自欺欺人。我感受到嘅剛需，喺好實在，同心理冇關，亦同樓價冇關。總之，
要住，就喺咁簡單。政策、樓價、市場心理之類，唔會影響
剛需嘅積聚，極其量只會拖延一下，將問題
連本帶利推到未來。
都喺果句，有求就有供，要發生嘅，始終都會發生。
