茶餐廳手記（#1102）買樓的人輸得多，賣咗樓的人輸得仲多

　　今日早上去到茶餐廳，有客人話見返以賣樓俾佢老友，老友好耐之前以一千萬買了一個物業，十年前以一億賣俾客人，較早前物業估值六千萬，欠銀行四千萬，日日都俾銀行追一千六百萬差額，唯有賣其他資產頂住，好彩樓市略為反彈兼有成交，銀行追數先至冇追得咁行，客人恭喜老友在樓市高峰時賣走那個物業，否則就唔見四千萬。

　　客人老友話，寧願當日冇賣走那個物業，今日最低限度都值六千萬，他當日賣走物業之後，以為自己眼光獨到，很快就買返三億物業，除了九千萬賺價之外，自己要攞多九千萬出嚟，問銀行借億二，諗住安全到不得了，誰不知樓價下跌，最新估值一億八千萬，輸了億二，如果當日冇賣走那個物業俾客人，最多只是輸四千萬，所以話，買樓的人輸得多，賣咗樓的人隨時會輸得仲多。

　　老闆話，客人的老友不是最慘，有很多在樓市賺到錢的人，相信自己的眼光，亦相信那些替他們賺錢的物業代理，既然替客戶賺到咁多錢，代理就會介紹客戶買那些劏場舖，並且話以一個車位價錢，可以買到一個舖位，首兩年並且有5%保證回報，兩年之後租金有升冇跌，老闆話結果唔使佢講，那些買劏場舖的人輸到連渣都冇，不過又不用替他們擔心，那些人大多數在物業市場賺過錢，不過，可能一鋪嘔突。