茶餐廳手記（#997）牌弱就要密食，食食吓就會旺

　　今日早上去到茶餐廳，有客人話昨晚佢老婆叫咗六嬸三太公到屋企打牌，食飯之前輸到阿媽都唔認識，於是叫佢老婆在食完飯繼續打牌的時候要密食，打麻雀有一條物質不變定律，牌弱就要密食，唔好做牌，食食吓就會旺。

　　港交所IPO以往是非常嚴謹，令到在香港上市的公司愈來愈少，一度跌到世界排名第六，仲衰過印度，但即使咁嚴謹，但不少公司在上市後立刻發盈警，並且長期跌破底價，由此可見，並不是審查嚴謹就可以保證能夠上市的公司一定是優質，反之一些有前途，但未有亮麗業績的公司被拒絕，而在其他市場大放異彩，由此可見，審查嚴謹並不保證上市公司的質素。

　　新總裁上任，採取孔子的有教無類，總之合格就可以上市，咁樣反而出現一個奇怪現象，就是剛上市的公司並沒有發盈警，雖然有一些在上市後跌破底價，但為數不多，反之表現亮麗的有不少，由於港交所密密食糊，食食吓就旺起上嚟，去年IPO竟然排名世界第一，今年估計上市公司吸納資金3500億，應該可以繼續排世界第一，原來打麻雀戰術真係有效。

　　有人不明白，點解以前在審查咁嚴謹的情況下，上市的公司在上市後很快就發盈警，現在審查鬆了，反而很少公司在上市後發盈警，這是一個態度問題，以前的公司以上市為終點，到達目的地就會放慢腳步，現在的公司以上市為起點，上市之後才衝刺。