茶餐廳手記（#1088）冇人有能力托樓市

　　今日早上去到茶餐廳，有客人話在週末同一個樓市專家食飯，專家話雖然樓價今年升了10%，但很快就會下跌，7月唔跌8月都會跌，因為托市的人已經用盡全力，到了強弩之末的時候，客人問那位專家什麼人托樓市，專家話托市的人托，古龍式答案，很難令人捉摸。

　　老闆話，現在有能力托樓市的人唔死一身潺，如果只得一兩個物業，就算有錢都冇必要托樓市，何必為他人作嫁衣裳，如果認為樓市有潛力而買樓，這是投資而不是托，唔投資唔會死，唔托就會死。

　　我相信專家所講托樓市的人，一定是物業投資者，專家太睇得起他們，現在大多數物業投資者都自顧不暇，能夠賣少啲手上物業已經很好，仲邊度有能力托市，市場上基本只剩下有需要而有能力的人買樓，他們不是托市，而是睇到樓市未來，如果專家知道冇人有能力托市，唔知會不會仍然話樓市會大跌。

　　有人話，如果銀行唔借錢俾人買樓，樓市一定下跌，咁同唔食飯一定會死冇乜分別，老實說，銀行已經好耐冇借錢俾人買樓，現在批出的按揭並不是借錢俾人買樓，而是根據借錢人的收入而放貸，樓宇只是抵押品，如果冇收入證明，銀行是不會借錢俾人買樓，在這種情況下，樓市仍然上升，睇樓市下跌的人一定知道一些不為人知的因素，如果樓市真係下跌，其他人不得不寫個服字。