一樓仁兄---
現在香港私樓步入調整期應無懸念，但在跌到乜嘢位先反彈呢，咁就有天壤之別，有人話要調你四五成，而我就話只是現水平跌一成有找！
好多人看好看淡，都無逆向思維，佢哋大多只預設答案，然後將利己因素無限擴大，又將不利己因素貶低或忽略！
例如淡友希望樓市大冧最少四成，咁佢哋就將美國退市，新盤供應大增，資金撤離亞洲，樓市有嚴重泡沫等不利因素擴大！
美國要退市？
如果美國經濟仲係唔掂，失業率仲高企，通脹率仲係喺低位----請問退條毛、加乜嘢息先？
利息升、樓就跌，表面上好合理，但你哋可有實例支持？
反之實際情況係加息週期開始嗰陣，樓市仲繼續升嘅例子就大把！
這是因為加息原因不離-----經濟過熱、貨幣增長過快、匯價下跌過急及資產價格有泡沫化傾向！
所以如供樓利息增加，但工資(通脹)同步或更快地上升，形成負利率，咁樓價再上一啲都唔奇！
打後半年新樓會大增？
打房政策全面開展，地產商使唔使從新規劃佢哋賣樓步伐？
本來朝三暮四，現在就焗住朝二暮四，甚至朝二暮三囉，而剩下嗰壹或兩件，等變現樓先來食，請問是否犯法？
DSD 及新預售樓花政策，根本就係迫地產商要大幅調整賣樓時間表，始作俑者請面對後遺症帶來嘅後果！
資金撤離亞洲？
熱錢撤離新興市場，會收埋喺床下底嗎？合理預測係咪去翻歐美或其他仲有得炒嘅新興市場先！
熱錢返回歐美，咁佢哋嘅債息會下降，間接幫助他們經濟復甦唔講，而香港經濟環境相對其他亞洲經濟體，尚算唔錯係無可否認嘅，起碼我哋股票市場無泡，政府仲有大把盈餘，加上港元同美金掛起鉤匯率相對穩健，咁隨時係印度及東南亞之失，可能係香港之得都唔定！
樓市有嚴重泡沫？
都唔知係唔係奸有奸輸，呢幾年政府嘅打房政策，效果就係幾乎把所有水份及泡沫擠曬出來，拒將任何把持不定、心大心細、無實力嘅人用鐵掃帚打走！
實際後果係最有實力、最有錢同最有決心嘅人先入場繼續玩，呢啲人得享低息之助，再受樓市步步高升優惠，而且佢哋仲因銀行嚴格審核制度所限，做唔倒高槓桿，所以按揭成數處於極低水平，平均只係借嗰叁成多，啲貨幾乎入曬強者手，請問啲泡喺邊度？
或者車位同白居 2有少少掛！
