多年前我初學投資物業時，請教一些資深投資者。老實說，唔會有人教。不過，大家經常一起飲啤酒，我又經常埋單，或多或少都會學到一些投資投巧。
有一日，有一位投資者在飲啤酒時叫了一支當時是新
出的墨西哥啤酒，大家或者知道是Corona，我覺得那款啤酒很奇怪，因為飲啤酒大多數喜歡大啖大啖飲，但那款啤酒樽口非常之窄，仲要在樽口塞一粒檸檬，飲得非常之不暢順。那位投資者話，新晉投資者很難睇到物業真正價值，如果唔想買錯，最好方法是向資深投資者買入他們的摸貨，畀多少錢他們賺。因為資深投資者已經做了分析，以後蝕本的機會就會減少，個名與墨西哥啤酒一樣，叫Corona Effect，或者可以叫日冠效應。前輩仲強調，如果要做一位成功投資者，這些錢一定要俾人賺。
老實說，我半信半疑，因為當時很多摸貨到最後一刻都會取消交易。如果我摸入，可能買貴很多，這些日冠效應不學也罷。不過，我不但沒有踢爆，而且仲千多萬謝，這是最基本禮貌。
當我有所小乘的時候。有一日，有一位業主搵我，他要求我買入他名下一個物業，簽定了一份買賣合約，但不需要付任何訂金，物業代理會將這份合約搵下一位買家，如果成功銷售，差額賺價是屬於我的。如果不能夠銷售，到最後一刻就會取消合約，我亦不會有任何損失。我當然沒有答應，否則隨時被業主與接摸貨買家夾埋屈番轉頭，光棍佬教仔，便宜莫貪，這句話我仍然記得。
很多人不滿意政府的打擊炒樓措施，認為擾亂了樓市的正常運作，但我有不同睇法。辣招不但加重了炒樓成本，並且降低了那些Corona Effect的機會，買家尤其是那些初次買樓的人，唔會畀人在中間賺了差價。
