很多年前，有同學老婆得了頑疾，知道不久於人世。當時同學的確很傷心，但亦很現實，擔心以後冇機會追到女仔，要孤零零過一世，問我有冇計。我話賺錢我就唔叻，不過旁門左道都可以見得下人，以後是否能夠追到女仔就要睇佢點樣對老婆。從今開始，以後對老婆要
晨昏定醒，百般遷就。當佢老婆過身之後，其他女士見到他的真誠，必定深受感動，屆時好似食自助餐一樣，任揀。但到最後，我唔知道這個方法行唔行得通。因為佢老婆畀同學真誠感動，唔捨得離開，到現在仍然非常恩愛。
新冠疫情肆虐全世界，英國首相BJ提倡群體免疫。他認為如果有六成市民得到抗體，全國人民就會免疫，但這個方法要死很多人，國民要有失去至愛的心理準備。今次真的是好嘅唔靈醜嘅靈，提倡群體免疫的BJ竟然確診，而且在沒有理會之下，情況愈來愈壞，最後竟然要入lCU，是否能夠康復是未知之數，有人話今次真的是作法自斃。
其實不能怪BJ，因為他知道英國醫療系統冇可能承受今次新冠肺炎患者的數量，提出群體免疫亦是無辦法之中辦法，最低限度會令一班在英國讀書學生打道回府，起碼可以舒緩一下醫療壓力。老友問什麼是群體免疫。其實，如果懂得下圍棋，就知道什麼是群體免疫。唔懂得亦唔緊要，群體免疫是隔離的一種方法，不過就以活人做隔離，活人唔死，就變成一道屏障，阻止病毒擴散。其實是很殘忍，殘忍在唔死兩個字，因為一定要死很多人才搵到唔死的人做屏障。老實說，我亦非常佩服英國佬，咁殘忍的主意可以搵到咁優美的詞語，以血肉之軀來抵抗病毒，我就會叫血肉長城。
老友話如果BJ有乜三長兩短，英國是否會踢哂腳。一定唔會，英國在管治方面上哂軌道，BJ唔掂，外相頂上，少少問題都沒有。不過，BJ那位已有身孕的未婚妻就慘啦。所以，即使BJ在lCU，都應該立刻與他的未婚妻結婚，倘若有乜依郁，他的未婚妻就變成遺孀，連同BJ的未出世小孩亦可以享有已故首相的福利。如果唔結婚，她們就是寡婦孤兒，而全英國人民見到BJ如此有情有義，下一任首相都唔使選，一定由佢繼續做，如果唔瓜的話。
