昨日，我見漢能仍未復牌，於是打電話問做股票老友，我以為佢一定會話，小股民人心惶惶，個市好亂，誰不知佢話，佢話一切如常，持有漢能的小股民不多，中國大媽例外，所以冇乜好驚，玩股票的人都知道，大價股講分析，分析準確，可以重鎚下注，細價股講膽色，小注怡情比較好，香港股民習以為常，又唔係未見過大風浪，對於那些貨源歸邊的股票，根本不會大手落注，輸極都有限。而且，近日差不多每一隻股票都飆升，就算小股民在漢能輸咗錢，其他股票早已賺到有突，在這個大時代，搵錢至上，漢能的事放埋一邊，我再說，漢能市值曾經超越長和，仲唔係大價股，點解唔講分析，講膽色，電話冇聲，原來我老友已經收咗線，股票大時代，分分鐘都係錢，梗係唔會同我這個地產佬吹水。

　　有老友問我，既然夠膽出「細價樓爆煲論」，點解唔出「細價股爆煲論」。首先，我對股票是一竅不通，如果買都只會買一些質量俱大的籃籌股，貪其易入易出，如果出事停牌，都是天意，至於那些二、三線股票，我唔識睇又冇時間睇，一定唔會買，如果我識睇又唔敢買，更加唔會叫人買，如果叫我寫「細價股爆煲論」，即是話俾人聽我唔識股票，豈不是穿煲。

　　有老友同我講，股場上有很多人希望我寫「細價樓爆煲論」，並不是他們欣賞我的分析，而是貪我做明燈，如果我話任何一隻細價股掂，他們立即沽清，如果話唔掂，就立刻入貨，老友雖然係咁講，但係我唔信，世界上邊會有人這樣買股票，跟紅還可以說得通，頂白就一定沒有可能。其實，股票同樓市都是一樣，大價樓講分析，細價樓講膽色，所以在去年，豪宅樓價不但沒有上升，甚至是稍微下降，因為豪宅的業主很多都是生意人，了解到香港經濟環境轉壞，利息趨升，就算供應有限，但回報率始終不高，除非是自住，投資則可免則免。細價樓又唔同，去年已經升超過了兩成，但仍然有人漠視各種不利因素，認為樓價長升長有，就算地產商以同區二手樓同價去貨，亦被演繹成新樓在入伙後仍然要在一段時間內忍受各項不便，所以，新樓與二手樓同價亦是合理，這樣的解釋不是用膽色過人來形容，我實在想不出更佳形容詞。在股票市場，股民可以以小注怡情的態度來買細價股，但買細價樓的人不但耗盡他們一生積蓄，而且還欠下一身債，對於他們來說，細價樓就即是大價樓，不能夠只講膽色，不講分析。