唔想再租樓可以點做?

一直都想講下我係網絡遊戲的樓價得到的經驗，不過呢個禮拜真係忙到痴左線，去到今日先有機會坐低係個梳化度享受下寧願的思考，呢種感覺突然變得好狗奢侈。


講起網絡遊戲，我諗好多人或者會即刻想離開我個blog跳去睇其他野，如果你係咁諗的話，可能你就會錯過左一個真實而又有人實際參與的模擬樓市實驗。


我玩的網絡遊戲都係十年幾年前了，果時都算係第一代（或者第一個）同時在線的多人遊戲。係遊戲當中，玩家可以選擇做唔同的野，比如戰士，魔法師，弓箭手，以至工匠，栽縫，馴獸師....etc....每個職業都可以有搵錢的途徑，而我初時亦係老老實實咁玩，每日如果打下怪獸，一日賺幾千蚊遊戲幣都係一件幾吃力的事，事關有時一死左，又要買番D劍啊護甲啊咁，所以儲到的錢唔多。


而呢隻game最勁的地方係佢有一個好大的地圖，只要你搵到空地的話，就可以以定價係上面起樓，呢样野同香港今日的社會係好鬼似。我仲記得，係game入面起一間細屋要44K，大D的villa就120K，高樓就要450K...etc。其實由於我玩的時候已經係隻game開左兩三年，故此，個地圖已經係其實比人起樓起到滿晒，所以新的玩家要起樓，基本上係唔可能，因為好多老玩家已經一個人起左好多樓。故此，我地呢D新玩家就要同人地買樓先可以係隻game有自己的居所。


當然，隻game入面同現實一样，人地賣樓比你一定唔係用成本賣比你，我果時好記得我其實係好幸運地搵到塊空地，起左間44K的屋，之後玩左一個月，已經可以200k賣比人。不過，44K的樓始終係上車盤，好多人自自然然當然越玩得耐就越想起大屋，但無奈隻game收客就越來越多人，但係土地就永無增加，樓的升值能力係隻game入面一直都好強，亦令到好多新買家強烈不滿。


咁作為呢隻game的營運商，賺錢緊係第一啦，而當佢地見到咁多新玩家起唔到樓，要係game入面同其他人買樓咁鬼貴，如是者佢地就出左個政策，就係一個玩家如果超過五層樓就唔可以再起樓，如果起左的話，其他樓就會係一個星期內自動刪除，而如果賣左的話，再買樓入黎，都會自動刪除其他樓，呢個政策一出，好多玩家即時唔再賣樓，樓價即時又升，真係諗番都好鬼似而家香港的情況。


亦因為咁样，隻game的上車盤都變到大約300K左右（好睇近唔近城市，越近就越值錢），而由於仲有大量玩家買唔到樓，於是個營運商就決定推出另一個世界，擁有同样版面地圖的世界，等d玩家可以重新起樓。由出版圖果日，成個樓市即係靜晒，而係新版圖亦唔駛一個星期已經比人起樓起到插針都插唔入，上車盤就完全無人要，因為太易搵地起啦係呢個星期，反而城堡果D就有人摩貨，因為一個server入面可能得十幾二十個城堡，起到果d，成本係1M，但係就叫價10M，但果時打怪獸都係幾千蚊一日（真實世界一日），所以10M絕對唔係一個細數。


雖然話呢家好多玩家上左車，但係樓價就由小型單位唔值錢，去到推左上d中價樓好值錢，因為D人有左上車盤就覺得無乜特別，反而去下D高樓啊，城堡就好咸，所以中價樓以致豪宅市道非常吃得香。


其實當時我玩呢隻game的原因，亦係為左賺生活費，可能你會覺得奇怪，但係果時我靠打機炒賣寶物樓房，放上ebay就可以執2000-3000美金一個月（不過都係做左一年），所以對於隻game的物價我好有影響我的現實生活，亦係因為咁，我留意到呢隻game出現左一件事，令到成個game改變左好多，呢件事就係--- QE。


事原係早期的時候，每1M的遊戲金幣可以賣20蚊美金，當然個遊戲世界係無政府話印幾錢出黎，所有的錢都係打怪獸由隻game每日24小時由玩家打出黎，但如果老老實實咁去玩，通漲就一定有，但應該係穏定上打先岩，故此由20蚊美金1M，到19蚊，18蚊，一直到15蚊1M，都係井然有序。不過突然有一日，我見到係ebay上面有條友大量賣金幣，由15蚊1m每個server都開20+ post以上，到14蚊，13蚊，以致10蚊1M，前後唔駛2個星期，由於去得太快，好多人以為自己執左平錢，但都發現自己唔夠幾日又買貴左野，D錢源源不絕咁供應出黎，令到我坐左的金幣都賣唔出要割價散貨。


幸運的係，我一般都係楂寶物楂樓房的資產比較多（實物），D錢唔知係邊度出黎的情況下，已經將果D城堡由10M推到上50M，平均物價亦大幅上揚。作為一個商家，我當然一直留意究竟發生咩事，到後來發現，原來有個玩家發現左一個bug，然後用20部電腦日以繼夜係度自己run個bug去制造game金錢，所以佢差唔多一個人引發左一個１QE出黎。你可能會話，超，打機姐，有乜咁巴閉？不過你話唔巴閉就有知，到呢個bug比個營運商發現左，到到佢地修复番，呢個玩家傳聞已經係ebay賣左超過USD500K(即大約3.8M港幣)，你話打機無用？果時2001-2002年應該夠full pay一層樓。


到QE呢個bug比人修复後，物價慢慢穏定落黎，但係我果時層城堡，已經由50M --> 120M，升左1.4倍，你都咪話唔勁。當然，由於隻game的設定，每日隻game 24小時咁run，打下怪獸就有錢生出黎，所以物價上升係必然的。


可能你會話，超，遊戲黎ga姐，關現實咩事，咁多野唔同？不過，從另一個角度睇，果時一個server有2萬至3萬人玩，每日有咁多唔同的商業活動係隻game發生，其實隻game係利用緊呢2萬至3萬個真人，某程度咁係度模擬現實生活的情況，亦因為有果次game的QE，我睇到經過咁多人的模擬情況下，有人睇好有人睇唔好，到最尾D樓都係要大升。你話兒戲又好，你話當佢係一個2-3萬人參與超過十年的模擬生活遊戲都好，我相信某部份的法則，同現實生活都好類似，亦或者可以從小朋友的遊戲，引導出現實世界的結果。