近日無論港九各旅遊購物區，工展會等都人頭湧湧，大家以為做生意的人一定會很開心，但原來唔係，根據傳媒報道，人頭湧湧的確不假，但旺丁不旺財，生意只是比去年微升多少，言下之意，怪責那些消費不高的旅遊人士，如果我是他們，知道被香港人嫌棄消費不高，就唔會再嚟香港，最後受到損失的仍然是香港。
老實說，真正做生意的人是不會話旺丁不旺財，因為他們知道，旺財先旺丁，如果冇乜人睇樓，成交量又點會高，所以，對於樓市報道，睇樓人士是非常重要的一環，百貨撞百客，多了人睇樓，配對的機會增加，成交量就會增加，這是一個樓市的物質不變定律。
雖然有女玄學家話近日雖然多了人來港定居，但是他們未必會買樓，只是旺丁不旺財，就好似佢買衫一樣，
買咗都未必著， 其實，關鍵並不是著，而是買，做服裝生意的人唔會理買家買咗衫之後著唔著，而是最緊要買唔買，著唔著是個人的事，買唔買就關乎生意，就好似過往有不少國內人在港買樓，但一年都用唔到兩個月，地產商是非常歡迎那些人，雖然唔旺丁，但仍然旺財。
有高級食肆老闆同我講，如果食肆爆滿，他會吩咐伙記開比較名貴菜式，客人見到人頭湧湧都唔會拒絕，反之如果只得幾枱客，就千祈唔好開貴價菜俾生客，希望養熟個生客，待適當時候才開一些比較名貴菜式，香港也是一樣，現在來港的人消費力冇以往咁勁，但如果他們發現，在香港消費，不用擔心買到贋品，食到不合格食物，就會放膽消費，甚至會變成一個常客，經常嚟香港消費，所以，千祈唔好話旺丁不旺財，俾個機會證明自己，香港是可以令遊客放心消費。
