有老友問明年樓市升或跌，現在是否買樓的時機，有不少投資者出貨，可不可以等多一陣，我話樓市已經連跌三年，物極必反，明年應該有大約5-10%升幅，如果不是有咁多投資者被迫賣樓，升幅會更大。
老友稍為唔同意，他認為可以等多一陣，因為投資者並不是攞一兩個物業出嚟賣，而是攞十幾個，可以等他們賣
了幾個之後才買，因為會愈賣愈平，現在買樓他日會好後悔。
老友想法與大多數人一樣，以為投資者攞十幾個物業出嚟一定要賣哂，其實，今次投資者要賣樓，大多數是因為銀行要求降低借貸比率，就算攞十幾個物業出嚟賣，但只要賣走其中幾個，就已經可以符合銀行要求，就算繼續賣，價錢一定會提高，但以我的經驗來說，當投資者借貸比率符合銀行要求，就唔會繼續賣樓，所以，現在買樓，要本著睇啱就買心態，千祈唔好等，否則蘇州過後冇艇搭。
老友叫我試舉例以明之，我話某一位投資者持有十個千萬元物業，每個借了六百萬元，總借貸比率六成，銀行要求將借貸比率降至五成，那位投資者毋須將所有物業出售，否則借貸比率不但降至零，而且仲持有四千萬元現金，變成過猶不及，投資者只要賣走其中兩個物業，將所得資金降低銀行貸款至四千萬元，而物業總值亦降至八千萬元，剛好是五成，當符合銀行要求之後，投資者就唔會咁輕易賣樓，所以，有能力睇啱唔買，日後可能會好後悔。
