有老友話，唔經唔覺已經到了年尾，往年在這個時候，樓市專家，測量師，玄學家都走出嚟預測樓市，非常熱鬧，有人講升兩三年，現在唔買樓就冇機會，亦有人話跌兩三成，現在是樓市逃生門，今日唔賣以後很難有機會賣，但今年非常平靜，不但公開預測樓市的人不多，就算作出預測的人，無論預測升跌，幅度都很少，上落5%之間，就算大摩有咁多研究員，對香港樓市是上半年跌5%，全年打和，不如講樓市平穩仲好，大摩評論員知道唔講得，因為樓市平穩就是飆升訊號。
一場足球比賽，如果某一隊一定不會失波，觀眾以為那隊波唔係贏波就係打和，其實是錯誤的，教練知道自己隊波唔會失波，就唔需要打防守，在全攻型之下，唔係贏波咁簡單，而係大勝，如果打算買樓的人知道封了蝕本門，自自然然夠膽買樓，最後做成樓市飆升都唔出奇，不過，樓市仍然有多少隱憂，所以，
評論員預測明年樓市都會比較保守，最進取的評論員都唔敢話樓市大升。
今年樓市應該最少有10%升幅，但最後埋單計數，可能下跌5%，很多人不明白，政府已經全撤辣，又以專才，優才，學生等引入大量國內人來港，但點解樓市仍然下跌，其實，無論撤辣或者引入國內人來港，效果都要等一段時間才顯露出來，相信明年會發揮得比較好，今年樓市下跌最大原因就是銀行收緊按揭，不少持有多個物業的業主措手不及，莫講話買樓，甚至要賣走手上部分物業以符合銀行要求，賣家多，買家少，樓價點會唔跌，如果銀行明年不再進一步收緊按揭，樓市是不會下跌，萬一銀行稍為放寬按揭，樓價就會調頭上升，一般評論員都唔知道銀行對樓市取態，所以唔敢講大升大跌，5%上落是最穩陣預測。
