星期日中午，從香港搭天星小輪去尖沙咀，打算在星光大道跑步，都未見過天星小輪有咁多人，過到去尖沙咀，星光大道同樣有好多人，跑完步從紅磡搭船去北角，回程經過維園順便去工展，太多人，插針都唔入，乜都買唔到，得個行字，至於點解咁多人，除了政府極力推銷之外，主要是一簽多行奏效，既然奏效，就要乘勝追擊。
有議員認為有咁多人來港旅遊購物，就應該開徵銷售稅，就算是5%都可以為香港帶來不少收入，
為財爺解決不少煩惱，議員不是生意人，不明白因加得減，因減得加道理，不少來港購物的人，其中一個原因是香港沒有銷售稅，加稅會令他們不來港購物，香港稅收反而減少，這就是因加得減，我估計財爺唔會開徵銷售稅，那些議員亦知道，他們譁眾取寵，博市民歡心而已。
香港官場有一個慣例，就是唔做唔錯，以往被燉冬菇的官員，都是提出一些改革，但後來未能得到預期效果而被問責，反而那些蕭規曹隨的官員就可以安安穩穩做到任期結束，唔做唔錯是香港官員守則，但似乎有所改變，唔做唔錯是行唔通。
一簽多行奏效，對於新任文化體育及旅遊局長來說是一個契機，既然有咁多旅客，出現夜繽紛的機會就大得多，旅客可以在香港玩到好夜才返回深圳，他們可能從香港坐的士直去關口，除了車費之外，要俾的隧道費亦不少，或者會影響他們在港消費意欲，政府何不趁此機會免卻晚上隧道收費，不只旅客得益，市民亦得益，雖然未知道效果如何，或者會影響政府收入，但如果奏效，就會因減得加，但唔試過又點知，保守一點，可以試行兩個月，如果冇成效就不繼續推行，行軍打仗，如果唔識得乘勝追擊，點都唔可以算是一個好將軍。
