Taylor Swift 在新加坡開演唱會，早已曲終人散，但很奇怪，過了咁耐，除了新加坡人大讚之外，仍然有演唱會非常成功的消息，有大學開班探討TS點解咁成功，甚至TS未婚夫都讚新加坡棒棒棒，令人覺得很肉麻，香港政府無論做得幾好，都只會畀人鬧，唔會有人讚，其實使唔使咁著跡，講得太多反而被人覺得是替新加坡賣廣告，弄巧成拙。
有新加坡學者話，新加坡政府雖然贊助Taylor Swift千八萬美元在獅城搞東南亞獨家演唱會，其實物有所值，除了
可以為獅城帶來五億美元經濟效益之外，仲可以有廣告效益，比向全球做廣告都有效，獅城學者咁樣講，令我質疑Taylor Swift 演唱會未必達到預定經濟效益，所以話當廣告費都抵，而事實上新加坡攞了咁多世界第一，全世界認識新加坡的人多過中國，仲使乜做廣告，千祈唔好以為學者的廣告效益概念很新潮，早在春秋戰國時代，四公子之一孟嘗君的食客早已做了。
大家都知道，孟嘗君有食客三千，終日無所事事，孟嘗君叫其中一個食客回到他的封地收欠租，並且叫食客順手買一些他缺少的東西，當食客去到之後，被封地租客捧上天，感覺自己有無上光榮，於是一聲燒數簿，將租客的欠租單據燒了，返到去對孟嘗君講，主公，你什麼都有，只欠一個義字，所以將數簿燒了，等封地租客知道你有情有義的人，孟嘗君心裡亦燒數簿，真係有苦自己知，冇租收又點可以養咁多食客，不過唔燒都燒咗，唯有話區區欠租，當賣廣告都抵，由此可見，當有人做生意最後話當賣廣告都抵即是蝕了錢。
