在香港政府半撤辣與優化專才買樓的計劃之後，不時有老友到香港睇樓，我食飯都食到驚，但又冇辦法，他們到香港買樓投資，正是香港現在最需要的人，唔通一兩餐飯都唔請，正是人在江湖，身不由己。
最近有傳聞大灣區樓價急跌，其中有人幾年前以600萬在東莞買了一個單位，現在只能夠以
280萬賣走，賣了樓仍然欠銀行百幾萬，於是向東莞老友求證，此事屬實抑或傳媒老作。
東莞友人話，唔敢講是真是假，不過近日國內樓價的確下跌了很多，現在放盤的人很多，買樓的人很少，業主雖然叫價很硬淨，但成交價是大幅低於叫價，不過，始終透明度不足，很多成交價都是傳聞，就好似當日樓市飆升時，不少天價成交，今日竟然發覺是沒有此事，不過簡單講一句，今時今日，在國內要賣樓，減價是唯一辦法，就算減價都未必有效，因為打算買樓的人在香港減辣，優化專才稅之後，首選買樓的地方，除了自己家鄉之外就是香港，而非其他國內城市，實話實說，香港減辣是令到國內樓價下跌原因之一。
我問國內老友點解咁睇得起香港，國內老友話，如果在國內其他城市買樓，即使在北京上海，最大功能是度假，但在香港買樓就可以有多功能用途，除了度假之外，又可以作為家族辦公室，甚至小朋友在香港升學，亦可以用作居所，一樓三用，何樂而不為，而最重要就是保值，現在香港樓被人唱跌唱到不得了，亦只不過比高峰時下跌了兩成，而且要賣走亦不是太難，有如此優點，點解唔買香港樓。
