有老友打算賣樓，但買樓的人不多，租樓的人非常多，物業代理叫佢先將單位出租，然後可以連租約賣，老友問下我的意見，老實說，如果將單位出租之後，有興趣買的人更少，因為在辣招之下，香港人買第二個住宅單位要付15％特別印花稅，已經很少人買樓收租，如果是自用的話，一定要交吉交易，單位唔可以交吉，根本唔會睇，即使單位有租約，業主都會先將單位交吉，清理乾淨，做一些執漏，然後才攞出去賣，點會有人將單位出租之後才賣，就算買家有興趣，都會大幅壓價。
老友記起，有一次帶客睇樓，老友以為個客想買，而客人只是打算
租樓，並且主動話他住得很好，但業主要賣樓，他冇辦法才搬走，他當時不以為意，原來業主在賣樓之前真係要將單位交吉，如果他如代理所說，先將單位出租，然後再慢慢出售，真係唔知道幾時才可以賣得出去。
市面上亦有一些單位連租約出售，打算買樓的人很難到單位睇樓，而且他們亦不了解租客，唔知道租客會唔會好麻煩，小小嘢都會投訴，是否有欠租，買家就算有興趣，都會大幅鋤價，所以，一般業主都唔會連租約出售，除非租客是親戚朋友，自己收唔到樓，唯有連租約出售，等新業主去收樓。
由於打算賣樓的業主都會先將單位交吉，清空現有租客，所以，愈多業主賣樓，愈少租盤，而租客數目則會增加，結果是租金飊升，政府只有兩條路可行，一是放寬港人買樓辣招，令香港人可以買樓收租，就唔會介意買一些連租約單位，租客亦有不擔心會被業主清空，不過就會受到不少人質疑，認為政府偏幫業主，所以政府明知是是可行，但遲遲唔敢去做。另外可以用強硬的方法，甚至會得到不少市民掌聲，就是推出租管，業主不能將原租客趕走，最多只能夠向土地仲裁處申請市值租金，不過這樣做表面上幫了租客，但實際上令到不少業主唔敢將單位出租，因為在出租之後不能夠收回，單位就要作出大幅貶值，業主不得不慎重考慮。
不得不提無論是那個方法，對業主都會有重大影響，而且結果是南轅北轍，如果撤銷辣招，樓價一定會上升，當然是有利業主，倘若推出租管，收租物業就會貶值，業主當然唔會歡迎，估計兩個方法政府都不會採用，唔會畀自己麻煩。
