有老友話我投資地產可以，但唔好寫評論地產文章，即使樓價比高峰時下跌了10幾個％，已經被人鬧到失暈，甚至有人話信錯我買了樓，幾乎要我賠返咁滯，反觀那些股市評論員，即使恆指比2018年高峰時下跌40 ％，但仍然冇人怪責他們，所以，點解要評論樓市，唔評論股市。
老友可能唔知道，我亦有評論股市，在2018年，匯豐大約60元的時候我叫人買，及後匯豐股價下跌，我俾人鬧足五年，直至最近匯豐升超過60元才冇人鬧，當時有評論員話，點解買匯豐唔買其他藍籌，只有那些唔識股票評論員才會叫人買匯豐，到今日有不少當日他們推薦的藍籌股，今日股價一半都冇，而匯豐尚有微利，所以現在冇人提及。
有股市評論員話評論股市已經是夕陽行業，我聽到之後開心到不得了，知道股市差不多見底，我可以再評論股
市，話唔定可以做一個醫病尾的行運醫生，我亦多謝當日鬧我叫人買匯豐的人，如果沒有他們，我一定不斷叫人買股票，股市一直下跌，我就會一直被人鬧，話唔定我都會講評論股市是一個夕陽行業。
老實說，香港股市下跌並不是因為大戶操縱或者散戶放棄，而是上市公司大股東太小心眼，如果能夠做到以下三部曲，我甚至會認為港股可以起死回生，全世界投資者都會買港股。
首先是賺錢，如果上市公司唔賺錢就乜都唔使講，有很多公司在上市之前賺大錢，而且前景甚佳，但上市之後就立刻發出盈警，令到滿心歡喜，又覺得自己好好彩抽到新股的人中伏，既然有咁多實例，不如斬腳趾避沙蟲，避開那些新上市的公司，等那些公司有表現時再買，總之一句說話，唔賺錢公司的股票就唔好買。
其次是派股息，有不少上市公司的確有可觀盈利，但就唔派息，話要留返資金發展，小股東等到頸長，最後只得一餐較為像樣自助餐，做股東做到好似乞兒咁，那些股票邊度會人買，如果能夠將一半盈利派息，在開股東大會時就算飲杯水都開心，不過就不能以股代息，否則即是攤薄股票價值，唔派好過派，如果唔賺錢就唔好派息，有一些公司唔賺錢反而派息，其實那些是掩口費，有息收就唔好鬧公司蝕錢，繼續持有那些股票最後可能遭到重大損失。
再其次就是回購，很多上市公司並不注重回購，認為回購是公司救市，是不利消息，其實回購不但是上市公司對自己信心表現，而且通過回購，股票數目會慢慢減少，就算一切不變，股價亦會上升，不過回購是要持續性，每年都要作出某一個數量回購，並不是在股價下跌時回購，因為如果這樣做，會被投資者一個錯覺，認為上市公司股價仍然會向下調整，所以，遲遲不作出回購。
大家唔好以為我亂話亂說，股票市場的確有上市公司符合上述三點要求，我就唔會開名，大家做下功課，搵錢一定要自己做功課，賺錢的時候開心很多。
