政府在7月7日宣布放寬3000萬以下樓宇按揭成數至7-6成，這對於打算換樓的人來說是一個非常好消息，隨時可以少付幾百萬首期，估計在未來一段時間，有不少小型單位業主會換較大單位，老實說，如果唔係買慣樓，到換樓的時候真係會膽顫心驚，如果先買後賣，代表有一段時間揸住兩個單位，代表欠債數字大增，未必每一個人都可以頂得住，但如果先賣後買，隨時變成賣咗買唔返，過往有不少業主
先賣後買，到現在仍然要租樓住。
有年輕朋友知道我換樓有多少經驗，由1100呎單位，換吓換吓，變成現在5500呎，問我有甚麼秘訣，究竟是先買後賣，抑或先賣後買，我話如果先賣後買，現在可能住緊幾百呎單位，根據我自己的經驗，除非現在的自住單位的質素非常差，好彩有人畀價，或者是一個高於市價多多聲的收購價，這才可以先賣後買，否則在任何時候都應該先買後賣。
當打算換樓的時候，一定要嘥一些時候去睇樓，如果遇到適合單位，就唔好左諗右諗，大膽畀一個合理的價錢，更大膽可以鋤吓價，鋤唔到又冇壞，最緊要的就是業主接受，就唔好縮沙，如果可以的話，要求一個較長成交期，如果業主需要一些時間搬屋或者移民，可以考慮買入之後租返比業主一段時間，有了這個條件，買到的機會又會大一些。
當買到樓之後，就要馬不停蹄，立刻賣樓，否則就算有錢成交都要繳付15%特別印花稅，千祈唔好以為有成年時間，慢慢賣都唔緊要，我見過有人因為過了期而要繳付以新樓價15%計算特別印花稅，如果以舊樓價計算，可能是25%，倒不如減多少價，益吓那個買樓的人，好過益香港政府，如果以這個態度換樓，我相信一定會成功，我是經驗之談，我已經換過幾次樓。
