已經唔記得有幾多財團或者個人家族做過亞視，好似只有邱德根家族有微利，所以，唔應該係亞洲電視，亞邱電視才正確，不過唔破財，就擋唔到災，家族中有人為此惹上官非，甚至失去幾年自由，此類型生意，少掂為佳，但很奇怪，一雞死一雞鳴，有人唔做，亦有人非常樂意做，其實，香港只能夠一個電視台，第二個電視台必定輸梗，輸錢贏聲名已經是最好結果，輸錢又俾人鬧的的亞視投資者多的是，究竟亞視點解冇得做，其實，一開始就冇得做，但仍然可以維持幾十年，我認為真的是奇蹟。
TVB開台的時候，我仍然在澳門讀書，當時，大家都唔知道TVB點樣可以營運，觀眾又唔需要俾錢，只靠那些少廣告費，如何能夠支持，執笠是遲早的事，有一日，家母同其他人討論這個問題，我的性格同家母一樣，學術上講就話係第十個人，市井講就係包頂頸，別人話冇得做，家母就話有得做，每次開電視就會走左個三色標誌出來，就算想睇亞視，都要專登去轉台，就算睇開亞視，熄機之後再開都會跳去無線，單是這一點，就可以斷定香港只有第一個電視台有得做，第二個就輸梗。
點解會出現這個情況，傳言就非常之多，包括無間道，有人話當時為亞視揀頻道的人禮讓TVB先揀，即使是事實，都只是影響最初的經營者，後來接手的人，都應該知道這個事實，出價以及經營方法都已經將這個事實反映出來，就不能夠用不是第一頻道做藉口，我不知道這是個傳言是否是事實，葉家寶在3月23日到我在明報會客室，我一定會問佢，但我直覺上覺得，家寶未必聽過這個傳言。
