CY一招食晏可以游二十分鐘水，何止是全城熱話，現在是全球笑話，外國傳媒以專題報導，質疑在中午一小時內，行出行入，換衫沖涼食晏，仲要游水二十分鐘，夠唔夠時間，田二少立刻以身試（辦）法，佢話趕得切，大前提是以生果當午餐，即是唔食晏，就算唔食晏，田少都只不過話趕得切，如果日日都係咁趕，命都短幾年，縱使游水是一項健康體育活動，但始終是得不償失。
CY可能是老闆級，唔知道中環打工仔苦況，尤其是那些中級職員，如果唔使同老闆或者客戶午飯，都會趁中午時間休息，或者整理一些重要文件，走去游水，即是話俾老闆知好得閒，老闆一定識做，簡直是攞苦嚟辛，中環打工仔不會咁蠢。
老實講，又唔怪得外國傳媒將這件事變成國際笑話，CY提出這個意見固然是魯莽，但最奇怪的是沒有幕僚提醒CY，有口痕友話，做CY幕僚大多數都是悲劇收場，破產有，入獄亦有，或者兩者兼備都有，所以，冇人會提醒CY，有時我都覺得佢幾可憐，一個在單打獨鬥，對上又應付中央政府，對下又要應付泛民社民，現在再加上本土派，壓力實在很大，中午去游水二十分鐘，清醒一下頭腦，未嘗不是一個好辦法。
