茶餐廳手記（#929）YouTuber 竟然唔知匯豐私有化恒生

　　星期四早上去到茶餐廳，有一個客人落落寞寞，老闆問有何心事，我話今次所有YouTuber 都失威，昨日仲話收到秘密資料，我被恒生列入觀察名單，今日恒生被匯豐私有化都唔知，失威失成咁，真係無顏見江東父老。

　　老闆話，點解我唔反駁恒生並沒有將我列入觀察名單，我話不能反駁，因為唔只恒生，連匯豐都係，並且在做生意之前，已經將我列入觀察名單，先講匯豐，十幾年前去老友嫁女宴會，匯豐有高層叫主人家介紹我俾佢認識，老友何只介紹，仲安排我們坐在一起，至今那位高層仍然睇住我們的戶口，唔好講債務違約，連供款都未試過脫期，匯豐唔單止得我一個客戶係咁，差不多所有客戶都按時供款，所以，我唔認為匯豐有問題。

　　至於恒生就更加主動，搵了一個在科大環球商學院畢業的職員搵我個女，仲請我們在恒生博愛堂食飯，我亦知道要準備禮物，五千萬物業做按揭，席間，恒生高管話我們未做生意，已經請我們在博愛堂食飯，是非常高格調，我有什麼表示，我話有，十億物業做按揭，與匯豐一樣，從未試過脫期，所以我話，我們一早已在匯豐恒生的觀察名單，YouTuber 講到好似發現新大陸，真奇怪。

　　至於匯豐私有化恒生，我認為是雙贏局面，匯豐有港歐渠道，恒生有中港渠道，相輔相成，大家都得益，還有，現在馬會的會員信用咭是由恒生代發，以後可能與匯豐一起發馬會會員信用咭，老實說，如果恒生不是潛在條件優厚，匯豐又點會溢價30%私有化恒生。