茶餐廳手記（#862）舊伙計又點會講老東家好說話

　　今日早上去到茶餐廳，有一個陌生客人食完早餐之後話出品唔錯，點解會有人講好差，老闆話唔出奇，不少被炒舊伙計同其他人講茶餐廳出品好差，已經見怪不怪。

　　彭博引述被炒的銀行職員話，香港銀行壞賬率高達2%，到年底可能去到2.3%，有客人質疑有冇咁多，老闆話，焦點並不是有冇2%咁多，而是邊個發表這個消息，彭博亦相當保險，講到明是一個被炒的銀行職員，對消息持保留態度，試問一個舊伙計又點會講老東家好說話，尤其是匿名者。

　　2%壞帳的確是一個極壞消息，所以，金管局總裁余偉文立刻否認，並且強調銀行體系健全，及後有關報道已經將壞帳改為不良貸款，老實說，兩者有天淵之別，壞帳有機會柳毅全輸，一毫子都攞唔返，而不良貸款，經過一番操作，例如沒收貸款人的物業，變成銀主盤在市場發售，不但可以取回全部貸款，而且仲可以收取手續費並且在期間可以收取高息，根本沒有損失。

　　銀行點解出現2%不良貸款，其實都是自己攞嚟，測量師行將樓宇估價大幅降低，銀行迫不得已揭客戶追差額，老實說，按揭邊度可能即時有錢還，唯有賣樓還貸，不過要賣樓亦唔係咁容易，部分客戶跟唔上被迫躺平，最後演變成債務違約，那些違約債務亦可以解讀為不良貸款，佔全港貸款金額2%，大約250億美元絕不出奇，但那些不良貸款大多數有抵押品，賣走之後絕對可以清還貸款，咁樣就唔係壞帳，彭博醒目，知道事件來龍去脈，除了話引述匿名已離職的銀行職員所說的話，之後仲將壞帳改為不良貸款，唔好搞臭自己個朵。