有意買新樓的人應大手入票

　　連日推出發售的新樓盤有一個特色，就是入票量非常龐大，尤其是以長地的新樓盤為甚，緻藍天不用說，最近的峻瀅2都有11,000張票，發言人亦表示投資客急彈，在長地開賣緻藍天的時候，我早已指出今次物業投資者將會大舉出動，入票量將會相當驚人，不過，與我講「細價樓爆煲論」一樣，絕大多數人都不同意我的說法，他們認為緻藍天有16,000張票，是證明市場上有強大剛性需求，投資者只佔極少數，有心或者無心賣樓的小業主在讀到這個訊息後，開價又點會唔進取，不但與新樓同價，甚至一浪高於一浪，所以，創新高價屢次出現，我被人笑到面黃唔緊要，但那些上車人士就用高價買了細價樓，至於那些新樓，大多數落入物業投資者手中，他們採取了一個策略，就是入票量非常龐大，縱使人數遠遠不及上車客，但票量龐大，中籤率反而高出很多，所以，有心買新樓的人，一定要採取與物業投資者同樣策略，以量先行，才有機會買到新樓，現在亦有不少準備上車人士採取此種策略，我估計大約二十張票就等如一個購買力，今次峻瀅2有11,000張票，代表有550個購買力，而峻瀅2有401個單位，一Q清袋應該沒有問題，長地犀唔犀利。

　　有人話唔需要自己入票，有物業代理行代勞代行，自己入一、兩張便可以，這種事以前我相信，現在我唔信，說到底仍未合法，EAA又睇實，物業代理行都唔敢做次，雖然代理頭頭說動用了十幾億替客戶買票，以十萬元一張，有千多張，EAA要的話，一定可以找到證據，但又唔見EAA發出警告，所以我認為就算物業代理行有替客戶入票，但數量並非如他們所說的龐大，而且是熟客，那些上車人士就免問，容乜易EAA放蛇，做正當生意做到犯法就唔係幾好，倒不如服務那些入票量龐大的物業投資者，至於那些上車客，抽唔到籤，變成向隅客，就叫佢哋去用高價買二手細價樓。物業投資者就唔同，抽唔到籤，就會等下一個新樓盤，可能會越賣越平，唔平就唔買。

　　在緻藍天開賣時，我對一位準備買樓的人說，既然準備了200萬買樓，何不入二十張票，入兩張同入二十張，機會大十倍，條友真的是聽我講入二十張飛，又俾佢抽到，所以，若果唔採取這種策略的人，對買樓仍然是心大心細，抽到都未必敢買。