老友兒子較早前買了樓，心情大靚，買了一份燒鵝背以及一份鹵水鵝片到公司，當然仲有梅子醬以及白醋，老友話兒子雖然在我的文章俾負評，但買樓都是因為睇我的文章，我恭喜老友，他的兒子大個仔，可以將政見同生活分開，千祈唔好以為很容易做，有不少人到現在仍然唔肯裝安心出行，寧願唔去食飯。
老友話我近日比較少出地產文章，究竟點解，我話有兩個原因，首先樓市走勢如我所料，再講就會俾人話認屎認屁，其次是寫評論文章，亦好似孔子所講醬不正不食，如果唔寫有關樓市案例或者政策，是不會吸引讀者，就好似今日老友帶來兩份鵝，如果用白醋配燒鵝，梅子醬配鹵水鵝，根本唔吸引，倘若今日我講明日大嶼，根本没有人有興趣，甚至會比人話唔識樓市，評論一定要配合形勢，此之所謂醬不正不食。
