有老友話上星期中原指數下跌了0.24%，對於那些話牛年樓市會很牛的人，算不算是一個警號，老友始終睇唔好樓市，所以稍有風吹草動，就立刻話樓市下跌，中原指數升了兩個星期之後作出些微調整，亦是合情合理，不用大驚小怪，否則的話，會搞到自己唔開心。
我話牛年樓市不但很牛，而且會是超級牛，老友話唔明白超級牛的意思，道理很簡單，一般分析員預測樓市，只是講樓價升跌，並沒有講成交量，我認為牛年樓市不但樓價上升，而且成交量亦會增加，所以，我話牛年樓市是超級牛。
老友問，究竟牛年樓市會升幾多，成交量又會增加幾多，我個人估計，樓價與成交量都會比去年上升10-15％，老友話如果樓價上升，地產商可能持貨不賣，何況現在已經取消了新樓銷售稅，做成價升量跌，超級牛恐怕未必會出現。
現在地產商做法跟以往不同，他們不會盲目追求高價，令到較早前以低價入市的業主有機會放售手上單位，無端端多了一批競爭對手，我認為15%已經是上限，當樓價上升，就會有更多新樓盤推出市場，務求食盡市場上的購買力，如果市況向好，就會價量齊升，超級牛出現。
