今早返工時見到一個已經十幾年冇見的俄羅斯朋友，十幾年前，我代表公司去星架坡與星政府商討一些物業買賣，過程持續了一年多，期間我去過星架坡20幾次，每次都要4-5日，老實說，在星架坡悶到嘔，最開心就是晚上到酒店的酒吧吹水，攰就返房瞓覺。

　　有一晚，我見到幾個俄羅斯人，叫我估他們是什麼職業，幾條友凶神惡煞，我估他們做殺手，不過唔敢講出來，原來他們是世界上3支最好的填海隊伍之一，咁樣我明白，去星架坡當然是替星政府填海，唔怪之得星政府願意出售當時大約值20億在香港的物業給我們，我知道這個消息之後，更有信心同星架坡政府傾買賣，星政府是必賣的。

　　天南地北咁講，我問3位俄羅斯朋友，究竟填海要多少時間，佢話星架坡水深，填海要多一些時間，我以為是10年以上，誰不知俄羅斯人話，快則3年，慢則5年，所以，當日我聽到明日大嶼計劃要二三十年，我知道這不是明日大嶼，而是明日大愚，政府敷衍市民而已。

　　今日有報紙報道，填海技術大幅提高，兩年多就可以建樓，有很多人問我這是真的還是政府老吹，我話這應該不是新技術，星架坡早已用過，不過，以前冇人提出，因為他們認為政府冇魄力搞填海，現在覺得政府認真去做，如果事成，香港土地不足老問題應該可以解決，還有，原來政府唔知道填海可以咁快。