風水師是物業代理天敵

　　有老友睇網聞，見到施永青同一位風水大師在一個論壇開拖。兩人各持己見，嘈得不亦樂乎。老友話老施食四方飯，點解會自貶身價同風水大師開拖？老友唔明白，風水師與物業代理是天敵，老施的反應亦只是反映出物業代理界的生存意識形態。如果唔開拖，物業代理所做的一切不及風水師一句話，以後物業買賣就由風水師話事，又點到老施唔開拖。

　　我們公司很少賣樓，但以前替公司在前線租樓，見到租客帶埋風水師到來就知道一定租唔成。即使租客很鍾意，但只要風水師講一句話，他們就會放棄，或者要求所睇的單位做一些不切實際改動，最後都會租唔成，所以現在我們不接受準租客帶風水師睇樓。

　　我曾經問過一位風水師，點解每次睇樓一定要講唔妥。風水師話，如果唔提出改動，他又怎能夠收顧問費？而且，買賣唔成絕對唔緊要，又可以睇過第二個單位，收多一次錢。物業代理就唔同，做唔成生意冇佣金收。所以，我話風水師是物業代理天敵。

　　有人話既然如此，風水師應該沒有天敵，物業買賣應該由風水師話事，但現在似乎又唔係，原因亦出自風水師身上。他們經常提出反對，相信他們的客人不敢買樓，錯失了很多機會。所以，買樓搵風水師的人愈來愈少，原來風水師的天敵就是他們自己。