昨日傍晚，有年輕朋友打電話俾我，話中原指數大升至152.39，政府分分鐘會出招，我覺得很奇怪，對上一星期為144，今個星期升至152，大力打了我同老施一巴掌，雖然，在過去幾年，老施和我預測樓市走勢並不一致，甚至呈現反方向，但今年我們都知道，對樓市的負面消息陸續出現，樓價應該會慢慢向下調整，在一月初至上星期五，指數下跌了兩點，我以為預測準確，誰不知，一個星期升了8點，我都想唔到用什麼理由解釋，不如收筆算了。
唔夠一小時，我收到那位年輕朋友Whatsapp ，佢話搞錯，原來中原指數跌了些少，今年連跌三個星期，但佢話唔知點解，一向放在第一欄的中原整體指數，今次放在包尾，而將其中一個分類指數放在第一欄，令人產生誤會，以為中原指數狂升8點，他不明白我亦不明白，政府亦不明白中原指數的計算方法，所以政府已經加快速度，房屋指數在每個月中已經可以知道上個月的升跌，以往是要多一個月，不過，兩者的結果相差不遠，中原指數的確有其參考價值，至於今次點解掉亂位置，就要問負責人才會有答案。
