樓市早已被開鑊

　　近日最熱門話題當然是游準議員忘記列祖列宗，有中國人唔做，情願做被人侮辱的支那人，佢要做都冇辦法，但千祈唔好要全香港市民，尤其是那些投票支持她做議員的人跟她一起做，游準議員語出驚人並不是今日的事，較早前佢話年青人冇地方扑嘢，已經做成社會上一個話題，我話游準議員女仔之家，人又生得標緻，開口埋口講扑嘢唔係幾好，應該講開鑊，不過，開鑊其實不是形容男女苟合之事，是一個化學反應，但大家唔知道又唔出奇，因為現在的鑊是即買即用，不用開鑊這個程序。

　　有老友知道浸大頒了一個化學院士給我，除了質疑校長錢大康是否瞓著覺之外，並懷疑我對化學是否略懂一二，老友唔知道，自從浸大頒了一個化學院士給我之後，我便開始寫一本以化學原理同反應來講解樓市的書，其中之一就是「開鑊」，開鑊其實是鋼化程序，在以往用的生鐵鑊，在使用之前，必須要用油和韭蔥放在鑊中以高溫不斷炒，直到韭蔥變碳，新鑊變成黑色，表示完成鋼化程序，新鑊以後就非常好用，而且不容易破裂，現在香港的樓市亦是一樣，三種特別印花稅以及逆週期措施，就好似韭蔥同油在新鑊以高溫不斷炒，經過五六年時間，兩款辣招都變成碳，樓市基本上亦已經鋼化，亦所謂被開鑊，雖然，並不能夠說樓市是硬如鋼，永遠不會下跌，但某個程度上的忽冷忽熱衝擊，樓市是可以承受得起，這會給予政府足夠時間在樓市受到衝擊時，可以調整一下壓抑樓市措施，甚至推出一些挽救樓市方案，有時回想，樓市如果不被開鑊，樓價大上大落，絕非香港市民之福。