昨日，有老友將王文彥，施永青兩人逐鹿中原的文件發給我，又立刻問我意見，我本來沒有興趣，但老友盛意拳拳，於是快速睇一次，睇完之後立刻回電，話我老友講錯，王施兩人並不是逐鹿中原，或者老施仍然可以用逐鹿，老王一定唔係，佢要求與老施每人做一年主席，根本唔敢硬拼，又怎樣可以話逐鹿中原，而且，老施提出一個條件便高下立見，他同意老王做第一屆主席，第二屆開始才由他們兩人爭取，老王都唔敢接受，令支持他的人非常失望，不過，我認為大家又唔需要失望，不少人講政治，講選舉，又話人人有投票權，但要他們放棄既得利益，又立刻會改變態度，老王唔係，主席位置擺在眼前，佢都唔敢坐，我覺得是弱雞表現，如果搞到要清盤，我就更加不明白。
我認為老王今次中計，老施根本沒有打算將第一屆主席的位置俾老王，但佢知道老王唔敢坐，所以便扮作大方，如果老王敢接，中原不知有幾多人行出嚟反對，所以我話老王中計，如果係我一定會做，有一屆時間部署，連任的機會一定比老施大，如果未能連任，就技不如人，無話可說。
大家唔好以為我替施永青講說話，老施非常憎我，去年，老施在每一次演講時的開場白一定是「有人話樓市爆煲，爆什麼煲」，大家應該知道，那個人就是我，老實說，我沒有如此廣闊胸襟替老施講說話，我只不過是以事論事。
