市場上有傳言，因為銀行財困，要向客戶追數，細價樓業主劈價賣樓是因為銀行追數，我覺得必定要作去澄清，只要細價樓業主按時還款，銀行是不會向業主追數，更加唔會迫細價樓業主劈價賣樓，如果有人攞得出證據，就唔該那位業主去銀行公會投訴，我敢肯定，一定不會有人去投訴，不過，如果某些業主有向財務公司借二按就例外，因為，金管局指引規定首按二按要一起計算，不能超過首按所限定的金額，但這些例子亦不多，財務公司亦不會犯法，再者，銀行又點會財困，如果客戶能夠通過金管局指引的規定，多多錢都有得借，現在銀行就是太多錢借唔出，說銀行財困，未免坐井觀天。
迫細價樓業主賣樓，其實是財務公司，樓價在三個月內下跌超過一成，而財務公司承做按揭時，估價又偏高，現在有不少物業已經資不抵債，業主已經採取放任態度，若果唔從速迫業主賣樓，愈遲損失愈大，而財務公司的貸款有很多是以私人貸款形式，倘若客戶不還款，財務公司可以釘契，銀行睇到客戶物業被釘契，便會要求客戶處理，如果客戶不理會，銀行便會強行出售那些物業，售出之後便會扣除欠銀行款項，餘額會交給釘契的財務公司，外人看來，好似是銀行迫售，其實是財務公司才是幕後黑手。
現在就算債仔賣樓，財務公司都未必能夠收回貸款，欠款餘額亦很難追回，不過，愈早賣損失愈少，所以，我認為細價樓樓價因為財務公司爭先恐後出貨，上半年會急跌，下半年就會穩定，打算賣樓的人實在不適宜現在賣樓，否則就會被買家鋤價鋤到心煩，既然如此，何不睇定形勢，謀定而後動。
