大摩的外國高層可能唔知道有「細價樓爆煲論」，更加唔知道我發表了爆煲論之後苦況，在去年，絕大多數評論員預測樓市有升幅，我亦沒有例外，我話樓市先升後回，到年底，還有幾個%升幅，本來冇事，誰不知我手痕，在二月初發表了「細價樓爆煲論」，一時之間，變成了一個樓市大反派，情況好似在澳門賭百家樂，人人買莊，我買閒，當時，樓市牛氣沖天，只是成交量略嫌不足，點睇樓市都唔會爆煲，就算幾老友的評價員都沒有站在我一邊，我單打獨鬥，一向以來，年初的預測是非常初步，大多數投行，測量師行會在年中作出修正，甚至有測量師在十一月仍然會對該年度樓市發表新的預測，但我不能，因為只是我一個人預測細價樓爆煲，在不能轉軚之下，最終要擺認輸宴，好彩，或者唔好彩，細價樓終於在第四季以大步伐向下調整，我亦由狗熊變成英雄，其實，年中我都想轉軚，但我知道，轉軚即是認輸。
今年樓價跌勢已成，我估計是集中在細價樓，但整體亦會有10%跌幅，與大多數評論員的預測吻合，今次輪到大摩力排眾議，估計今年樓市有5%升幅，年初跌，年底升，我覺得今次大摩大鑊，人人買莊佢買閒，其他評價員一定牛咁眼睇實全年樓市表現，大摩一定唔能夠轉軚，否則，即是認輸，如果唔轉軚，到年底有很大機會會輸，我輸就閒事一件，但大摩是大投行，賭輸就會影響商譽，而且人人贏，得佢輸，其實，大摩只是將預測稍為修飾，話今年樓市升跌5%，咁樣講，就立於不敗之地，不過，如果樓市真的是上升，無論升幾多，大摩都是大贏家，諗得過。
