最近，不時有一些賣樓的個案，就算業主以低於市價出售，但依然獲利甚豐，報章的報導，令人誤會投資地產是很容易賺大錢。其實，這只不過是幻覺，如果賣樓的人不是當日的買入價平，今日就可能會變成蝕讓。今日樓價的確在高位，那些在今日買樓的人他日是否能夠用更高的價錢將物業賣走，又能夠令到報章報導物業轉讓，獲利甚豐就不得而知，但亦有機會該項報導是蝕讓，不過，今日以創新高價買樓的人，只要他們唔賣，就算物業貶值，只要他們唔賣，報章就不能報導他們蝕讓。
 
　　當日，那一班以低價買樓的人其實有雙重收入，除了賣樓時大賺一筆，在持有物業期間又可以享受低息，但這情況似乎正在逐漸遠離。到現在以創新高價買樓的人，他們就要多付利息，如果他們將物業出租，大有可能會出現負回報，即是要貼錢，要守著這個物業，就要不斷貼錢，大家唔好以為我危言聳聽，以往做業主就是這樣，偶然出現租金收入大過利息支出，就會俾人叫財息兼收。
 
　　到了那時候，有心買樓的人都唔會買樓，情願租樓，甚至將自住物業賣走而租樓住，賣樓所得款項就會投資在金融市場，賺取更優厚的回報。我唔講大家都應該想得到，屆時供應就會增加，樓價就會下跌，如果賣樓，就會是財息兼失。所以，大家現在見到賣樓的人賺錢，千祈唔好以為買樓必賺，時間唔同，結果亦會唔同。所以，選擇買樓的時間是非常重要，因為利潤有很大機會是因為買得平，而非賣得貴，當然，買得平又賣得貴，獲利自然最豐厚。