如何回答子女說父親節快樂

　　鬼佬越搞越多嘢，搞完母親節，現在又搞父親節，問十個香港人，九個半唔知道兩個節日的來由，另外半個會立刻上網查，不過，網上的答案都似是而非，我認為兩個節日都是由百貨商人搞出來，目的都是想多做生意，母親節早已很成功，今年，父親節亦不遑多讓，小兒訂位食飯，什麼馬會，銅鑼灣遊艇會，上海總會等全部滿座，由此可見，香港的經濟不太差，樓價仍然有支持，我的「細價樓爆煲論」可能唔爆，老實說，唔爆好過爆，望人富貴好過望人閉翳，樓價唔爆，父親居功至偉，如果做父親的唔努力苦幹，幫助他們的子女買樓，少了這批年青生力軍，細價樓很難支持到現在樓價，很多父親知道買樓容易供樓難，買咗樓，付了首期，子女們未必可以供得到，到頭來，供樓的擔子又要回到父親手中，做子女的千祈唔好以為老豆只是幫他們供樓，其實，父親為了替子女俾首期，很多時都要加按自住物業，如果子女唔供樓，他就要供兩層樓，想唔苦幹都唔得，除苦幹外，仲要延長退休年齡。

　　今年父親節，那些由父親幫助買樓的子女一定相當識做，我個仔訂唔到的地方，他們都可以訂到，就算那些未幫助子女置業父親，他們的子女亦一樣識做，希望有要求的時候，父親唔好托手踭，做父親又怎會不知道，不過，就難為了那些未有能力為子女置業的父親，可能會受到冷眼對待，我希望他們的子女仍然可以衷心說一聲父親節快樂，其實，做子女的，無論父親有沒有幫助他們置業，都應該時刻希望父母快樂，置業由父親幫助其實是額外獎賞，但並不是必然的。

　　細價樓樓價飆升，那些已置業的年青人個人擁有資產多了不少，如果是由父親資助的話，他們會認為應該趁父親節回饋父親，到酒樓食飯時叫頂給套餐，不過，想唔叫套餐都唔得，加幾支靚酒，埋單唔使一萬都要八千，做父親知道兒子搵萬五元一個月，一餐飯就用咗半個月人工，或者會口多講一句慳D使，誰不知做兒子的一面簽咭一面講，賺到錢一定要消費，隨即送一份名貴但唔等使禮物給父親，並且說“父親節快樂”，做父親的應該如何回答，老實說，我唔知道。本來，這篇文章是沒有答案，但剛巧小女入書房同我講“父親節快樂”，我本能回應說多謝，小女很奇怪望著我，乜唔係話乖，這個答案我又沒有想到，咁大個女，仲講乖。