有老友見我近日賣走十幾億物業，雖然大部份是有錢賺，但仍然是低於市價，由此可見我是等錢用，最大可能性就是被銀行call loan，落井下石式問我，現在有不少物業投資者被銀行call loan而被迫賣樓，投資物業是不是最高危行業。
老友可能唔知道，有能力賣樓的物業投資者已經唔錯，而且有咁多物業可以賣，梗係賺返嚟，唔通一出世就有，既然可以賺到咁多物業，又點能夠話投資物業是高危行業，而出問題的投資者，並不是物業投資出現問題，而是利用物業向銀行借錢做其他生意，樓價下跌，他們不及還錢，唯有賣樓還貸，
甚至躺平任由銀行處置他們的物業，更有甚者是債務違約，如果物業投資者只是投資物業，受到金管局逆週期措施的管制，貸款金額不能超過物業價值四成，就算樓價下跌，最多是賣樓還貸，賣完之後仲有好多錢剩，點講都唔係高危行業。
今年閏六月，唔知有冇兩個魯班師傅誕，如果魯班師傅知道他的三行弟子從事的是高危行業，真係會激到嘔，而且不是泥水，木工，油漆三行中的一行，而是僱用三行工人的發展商，很多人認為發展商也是物業投資者，不過發展商是正派，買買賣賣的物業投資者是反派，咁講就唔係幾啱，大家都是將本求利，面對同樣風險，大家都是正派，不過，我唔講大家未必知道，發展商的風險比物業投資者大得多，如果大家唔信，就睇下最近在地產行業債務違約的人，全部都是發展商，物業投資者如果被銀行call loan，如果賣樓能夠解決就最好，否則就最多躺平，在金管局逆週期措施之下，投資物業最多只能借四成，就算偷雞最多借五成，躺平任由銀行賣樓，投資者有機會蝕晒所有投資，最後得個桔，銀行唔會有損失，所以，物業投資者並不是高危行業。
做發展商就唔同，一個發展商如果有一幅地，建築費每呎五、六千元，兩年前地價隨時過萬，建築費佔成本少過三成，銀行搶住嚟借，現在就唔同，地產商唔投地，地價急跌，建築費佔成本七成以上，銀行就打退堂鼓，甚至向發展商call loan，而建築中地盤又唔值錢，做成最近有不少發展商債務違約，如果搞唔好，發展商除了輸哂所有投資之外，甚至有機會破產，如此來說，三行之父發展商仲唔係最高行業，魯班師傅知道都會激到彈起。
其實，無論發展商或者物業投資者都知道，在國內優才，專才，學生湧入香港IPO集資全球第一，資產管理超越新加坡，僅次於瑞士之下，而供應則幾乎停止，樓價飆升是必然的事，如果現在被迫離場，真係好唔抵，不過，投資就是這樣的，金山之前一定有一個金塔，過唔到就一切如幻化泡影。
