點解余偉文強調不會強拆聯繫匯率

　　日前彭博報道，香港銀行囤積現金，對銀行LCR流動性覆蓋率高達180%，個別銀行甚至去到300%，遠高於巴素爾3要求的100%，彭博以香港銀行囤積現金為標題，其實是非常嚴重，老實說，若非彭博報道，我相信大多數香港人都唔知道香港銀行囤積現金。

　　週末有不少人問我香港銀行點解要囤積現金，以我對銀行業有少少認識來說，有兩個可能性，第一就是有個別銀行有嚴重不良貸款，如果爆雷，將會有不少存戶提取現金放在海外銀行，香港銀行的LCR一定會急速下降，如果只是維持在100%，恐怕在短時間內會下降至50-60%，將會影響銀行融資成本，如果提高至180%，即使下降60%，仍然符合巴3要求，不過，我認為這個可能性不大，在逆週期措施之下，香港銀行很難出現大額不良貸款，銀行毋須刻意提高LCR。

　　另外一個理由就是強拆聯繫匯率，如果港元與美元脫鈎，港元一定會大幅貶值，如果銀行借了港元出去，到收返的時候就會唔見很多錢，香港銀行不但唔借錢出去，仲要高息搶定存，做了定存的客戶，如果港元貶值，就立刻唔見了一大筆錢，做成LCR高達180%，有人認為我天馬行空，但金管局總裁余偉文覺得有道理，所以在接受訪問時強調不會強拆聯繫匯率，香港不用自亂陣腳，香港銀行收到這個訊息之後，如果將LCR下調，流動資金就會比較充裕，亦不用高息搶定存，拆息亦會回落，對營商環境以及地產投資有正面作用，至於仲有冇其他理由，我唔敢話冇，不過我唔識。