近日有搞展覽的人話，市民北上消費，假日留在香港的都是窮鬼，所以年宵攤位大多數以底價租出，另外，香港有一個美酒佳餚展覽，參加的人話第一日人流不多，打過和已經算唔錯。
其實我唔係幾明年宵市場的投標者點解咁灰心，去年大多數年宵攤位的參加者都有不俗利潤，仲表示今年一定會繼續，點解突然失去信心，或者唔可以講得太好，無謂有人爭，我們又即管睇吓香港今年年宵花市係咪那些人講得咁灰。
至於美酒佳餚展，並不是零售市場，政府搭一個平台出嚟俾參展商，希望他們用作推廣自己產品，尤其是政府大
減酒稅，唔趁機會推廣就笨，用作賣魚旦魷魚簡直浪費了政府一番心意，咁樣講連個天都唔幫，潭美到訪，3號風球高懸，美酒佳餚展暫停。
我認為睇香港經濟，要睇三個展，如果三個展都唔掂，香港真係唔掂，首先是工展，大多數參展商都會以推廣價賣自己代理產品，最重要一點是貨真價實，沒有假貨，除了香港人買之外，仲吸引不少國內買家，現在香港追求平，國內人追求正，所以，只要貨物是正貨，國內人唔介意俾高價，更何況有推廣價。
第二個展是年宵花市，本來過年行花市是一個活動，與經濟好壞無關，就算經濟差都會行花市，最多買少一些年花或者過年用品，現在俾參展商話留在香港過年的都是窮鬼，搞到我都唔敢去，容乜易俾人話我係窮鬼，其實，過年能夠留在香港的才不是窮鬼，全年都可以同人去旅行，點解要過年去貪同人迫，我相信今年年宵花市唔會差，除非落雨，咁就冇得講。
第三個是會展，如果冇參展商來港，香港真係唔掂，但我了解到今年會展的生意很好，不少參展商已經預訂明年的參展攤位，所以，千祈唔好冇事呻吟，否則連個天都唔幫。
