預測天氣轉好，漁民準過天文台

　　星期三早上，秘書話颱風摩羯移動途徑已經稍為偏離，直飛海南島，對香港構成的威脅已經減少，但天文台仍然話星期四下午有機會掛8號風球，如果係咁樣，星期四、五的約會是否要取消，唔明白天文台明知摩羯偏離仍然要掛8號風球。

　　天文台對於天氣預測一向都是夠膽講衰，唔夠膽講好，好似近日天文台不時話在未來一兩小時會有暴雨，最後乜都冇，但唔見有市民話天文台亂咁預測，但如果天文台話未來一兩日天朗氣清，但最後出現暴雨，相信天文台會俾人鬧到失魂，雖然摩羯偏離香港，但天文台仍然要提高警覺訊號，擔心萬一摩羯轉軚，好似當年溫黛，直撲香港，天文台台長落台都唔掂，所以，天文台對於天氣預測是夠膽講壞，唔夠膽講好。

　　其實預測樓市與預測天氣都是一樣，一般評論員都是夠膽講衰，唔夠膽講好，例如有評論員話今年樓下跌10%，結果不但沒有下跌，甚至有微升，絕對唔會有人話那些評論員預測不準確，但如果有評論員預測樓市上升，但結果是下跌，那位評論員一定會俾人鬧爆，久而久之，愈來愈少專業人士夠膽預測樓市上升，預測打平手已經好夠膽，但原來樓市在不知不覺間升到市民不能負擔水平，政府不得不推出辣招來壓止樓市升勢，這就是評論員夠膽講衰，唔夠膽講好後果。

　　預測天氣幾時轉好，漁民比天文台更加準確，因為漁民要搵食，如果等天文台落波才起航，咁樣真係執水尾。樓市也是一樣，投資者比評論員更加準確預測樓市幾時止跌回升，如果等評論員確認樓市轉好才買樓，可能要從其他物業投資者入貨。