每一年年初，我會叫同事與銀行職員食飯，一方面聯絡感情，另一方面探下口風，如果銀行借錢俾人買樓，樓市想跌都難，如果唔借，樓市又點會升，今年口風是，未到中秋，銀行都唔會借錢俾人買樓，但我發夢都估唔到，今年銀行不但唔借錢俾人買樓，甚至將估價下調，向借貸比率上升的業主call loan，唔借錢兼call loan，樓市想唔跌都難。
本來樓市因銀行取態而大跌，好彩在年初時，香港政府果斷將辣招全撤，令樓市有一陣亢奮，但激情過後，樓市
恢復下跌，至今大約跌了5%，比大多數專家的預測為低，雖然仍然有不少專家預測今年下跌10%，但我認為差不多見底，上星期五中原指數比一個月前下跌了1.21％，在銀行仍然未停止call loan以及恢復放貸，樓市有這樣的表現其實是利好消息，當銀行停止call loan及恢復放貸，樓市就會回升，如果配合美國減息，樓價一定會大升，撳都撳唔住。
有一個難題，或者是銀行為了面子，一定不會主動停止call loan及恢復放貸，除非是政府向銀行施壓，財爺在星期三傍晚的記者會亦清楚表示，銀行唔應該向準時還款的按揭客戶call loan，至於銀行幾時開始借錢俾人買樓，我相信很快，在中秋節之前，應該有銀行提供回贈吸引有需要的人買樓，當銀行唔再call loan以及恢復放貸，無論樓價升跌，才可以話這才是樓市真面目。
