專才來港，大多數先租後買

　　有專家話雖然已經有14萬專才已經來港，但是他們都唔會買樓，對樓市的幫助不大，樓價會繼續下跌，唔劈價蝕讓根本賣唔到樓。

　　專家可能冇睇最近數據，所以順口開河，年初到現在已經賣了一萬個新樓單位，其中七成是國內人士，到年底，應該最少有一萬個新樓單位由國內人士購買，只要樓價保持平穩，明年將會有更多國內人士買香港樓，到明年底，香港新樓的潛在供應量就會回復正常水平，即是在未來三至四年有九萬三至四個新樓供應，雖然話是正常水平，其實到了那個時候，新樓供應已經追不上需求，因為當政府講潛在供應量的時候，並未計算大量來港的專才／優才，我唔敢講樓價一定會上升，但現在在各項不利因素之下，樓價仍然保持平穩，當不利因素消失，樓價的走勢是可以預見。

　　專家話如果唔劈價蝕讓，根本很難賣樓，理論上樓價應該急跌，而事實上中原指數上星期下跌了0.11 ％，而比對一個月前，亦只不過下跌了0.2 ％，換句話說，樓市已經穩定下來，銀行如果唔call loan以及恢復借錢俾人買樓，而利息又開始下跌，睇唔到來港的專才點解唔買樓而繼續租樓。

　　老實說，專才現在唔買樓亦是正常，移民去了外地的人應該了解，到埗後甚至到埗之前是不會買樓，大多數會在開始的時間租樓，直至覺得適合自己繼續留低生活才會買樓，已經到港的14萬個專才，只要有一成在香港買樓，立刻會令到需求大過供應，當潛在供應量回復正常，業主就不用劈價蝕讓才賣到樓，樓價亦會回復正常。