近日有幾層非常優質甲廈售出，價錢又唔貴，唔使問阿貴，業主一定被銀行call loan，在無計可施之下，又唔想物業變成銀主盤，唯有賤價出售，老實說，如果不是擔心銀行向公司call loan，我亦會考慮買入，現在當然唔敢，留返啲錢傍身，今日講當然是合情合理，其實，幾年前我已經係咁講，當日畀人笑到面黃。
對於銀行近日不斷向依時還款客戶call loan，我問一位銀行家，根據國際慣例，銀行是唔會向依時供款的客戶call 
loan，現在銀行打破這個慣例，不但向依時還款，甚至有足夠抵押品的客戶call loan，以後銀行要搵生意就很難，唯有做其牛後，參加一些銀團貸款，借十億八億俾人，仲要多謝大債仔俾生意自己，係咪自作賤。
銀行家話大家誤會了，他們亦有苦衷，現在賤價賣走優質甲廈的事，並不是今年才發生，債仔已經停止供款好幾年，銀行追數亦追咗幾年，由於借貸比率很低，債仔認為銀行的風險不大，所以總是有拖冇欠，更加不會問其他財務機構借錢供款，因為利息一定會比銀行高得多，唔供款就是大忌，講乜都冇用，折騰幾年之後，銀行唯有迫客戶賣樓，而客戶亦自知理虧，所以唯有賤賣物業。
我認為大家的確誤會了銀行，不過話分兩頭，銀行最近的確向依期供款，借貸比率合格的客戶call loan，甚至令到金管局出聲話銀行不要向依期供款的客戶call loan，更加唔好改變貸款額度，咁樣做是破壞銀行信譽，金管局是幫銀行而非害銀行，不過，現在的銀行家是很少心，寧願得罪客戶都不敢逆銀行的意思，否則如果被炒，銀行是會向他們call loan。
