大家經常話，五窮六絕七翻身，其實冇乜科學根據，但又很奇怪，五月，六月消費意欲又唔係幾好，本來五月都唔應該太差，因國內有五一勞動節長假，而香港只得一日假期，北上消費的人一定唔夠國內嚟香港的人咁多，但過去幾年受疫情影響，五一假期都冇人嚟，想唔窮都唔得。
今年五一假期又唔同，有大量內地旅客，令到有部份港人可能冇得放假，因為要加班接待內地旅客，大家唔好以
為只得做零售或者保險行業的人才冇得放假，今年在銀行工作的人，亦有不少要取消休假，因為有很多內地人乘五一假期之便嚟香港開戶口，以後可以每次帶二萬人民幣來港，用剩咗可以存入戶口，集腋成裘之後，可以買股票，去外國旅行，甚至買樓都得，估計在五一假期有80萬內地旅客，至少有一半會開戶口，有人質疑會唔會有咁多，因利乘便而已，開個戶口好似搞自動過關一樣，方便自己，有時間點解唔開戶口。
在五一假期之前，恆指連升1500點，已經唔知幾耐未試過，跌1500點就經常發生，理由很簡單，香港人知道有咁多內地人來港開戶口，當中或多或少都會有人買股票，恆指早已跌無可跌，一定會藉此反彈，香港人唔會咁執輸，點會唔買股票。
地產商亦磨權擦掌，我唔敢講磨刀霍霍，在五一假期有不少新樓盤推出，亦有少新樓貨尾單位，內地人想買樓的話，一定唔會失望，有內地老友同我講，他們唔擔心買香港新樓，因為從不爛尾，原來唔爛尾都是一個賣點，地產商千祈唔好破壞自己商譽。
我有好多內地老友來港，要安排食晚飯，本來家宴是最好，可以飲到亂晒籠，但廚師早已約滿，高級食肆以及會所亦爆棚，唯有用菲藉家務助理，新加坡人叫菲勞，咁嘅情況下，大家都搵到錢，股市又升新樓又超額認購，我夠膽講，今年五月不會窮。
