多年前我有一次去日本，老友請我去食頂級壽司，師傅是大師級，不苟言笑，甚至連我們傾偈都唔得，要專心欣賞他的手藝與食材，無可否認，兩樣都是頂級，手藝不用說，大師傅對於用料很執着，唔好講邊角，質素稍為差啲都唔會用，明明是三個人用大拖羅，切到僅僅夠兩個人用，據聞餐廳老闆經常對客人投訴話大師傅太浪費，不過，餐廳有錢賺，老闆亦冇符。
兩年之後再去日本，本來想再去那間壽司店，老友話大師傅同老闆頂了間壽司店，唔使幾耐，壽司店因為冇生意
執笠了，不過，大師傅現在替一間小店打工，又唔知點解，人龍又再現，今晚可以去試吓，大師傅知道我去，專登留了兩個位俾我們。
在壽司吧坐低，大師傅自嘲自己冇老闆命，替人打工生意不知幾好，自己做就拍烏蠅，大師傅唔知道，替人打工就捨得，自己做就唔捨得，一件可以切成三人份的大拖羅，替人打工只能切到兩人份，自己做就可以切到四人份，顧客是精明的，會用腳來表達意見。
這個經歴是我半年前講俾一個做餐廳的老友聽，老友話生意不好，打算將食材份量減少，以及採用較便宜食材，我話千祈唔好，應反其道而行，應該提高食材質素，加大份量，生意才會有起色，老友最後聽我講，現在餐廳已成網紅店，日日排長龍，做生意偷工減料不但不可以起死回生，甚至會加速滅亡。
