有老友知道我認識不少有錢佬以及富二代，問我現在的富二代是否爛滾爛玩，我話據我所知，現在的富二代不但教育水平比富一代高，唔會爛滾爛玩，反而很用心做生意，希望青出於藍，但富一代想法有些少不同，在爛滾爛玩與熱衷做生意，大多數富一代都希望富二代爛滾爛玩，或者爛滾爛玩唔好聽，應該是識飲識食。
有老友最近愁眉苦面，我以為畀銀行call loan，原來唔係，是佢個仔與人拍檔做生意，他只是小股東，以為玩
吓，又冇簽擔保，點知拍檔知道佢係富二代，橫掂有人墊底，唔亂咁使錢就笨，最後欠租欠糧欠貨款，俾人貼街招追數，搞到佢個仔都唔敢見人，日日在屋企躺平，其實，所欠的金額不是太多，找數就可以，最怕找完一筆又會出現另一筆，現在唯有搵追數公司拆掂佢。
老實說，我所識的富二代大多數不但教育水平很好，而且很有魄力，又唔爛滾爛玩，本來非常完美，但可惜他們是富二代，是一個原罪，不時有人搵他們拍檔做生意，那些人很多都是心術不正，賺到錢認為是自己功勞，點解要分俾富二代，蝕了錢就關人個關，叫債主追富二代，所以，我一向主張富二代唔好同人拍檔做生意，如果一定要，就要做大股東，因為做大股東還可以控制，做小股東沒有話事權，任由其他人擺佈，輸了錢就要富二代孭飛，千祈唔好以為投資些少，玩玩下冇問題，輸哂都有限，其實可能是無限大，做小股東就已經輸了，拍檔與債主就是贏家。
老友話，佢個仔答應，如果將欠債事件搞掂之後，就返公司幫手，我話如果係咁，就唔好咁快搞掂，一定要個仔受到教訓。
