我在初出道時，公司每年都會大搞年夜飯，老闆很民主，同意在年夜飯中的表演，同事可以有限度取笑佢，不過，記得適可而止，但很多時同事飲大咗，將老闆的醜態講出嚟，老闆迫於無奈，
在席間仍然是笑笑口，但年夜飯之後，那些同事就慘了，唔好講升職加薪，就算老闆見到他們都會面黑黑，同事之間一定會話老闆唔啱，講到明可以自由發揮，點解事後又會嬲爆爆。
很多人唔明白，老闆容許伙記在年夜飯取笑佢，因為心知道伙記是有分寸，在取笑佢之餘又會讚吓佢，而且是讚多過彈，咁樣做，老闆想嬲都唔得，但很多時上台表演的伙記得意忘形，本來準備好讚老闆的說話一句都唔講，取笑的說話就過了火位，結果唔使我講，大家都應該估得到，就算幾好風度老闆都會唔開心。
有很多公司的年夜飯都會搵一些藝人撐場，例如搵阿Bob做司儀，大家估下阿Bob會不會取笑公司老闆，當然唔會，因為阿Bob知道，是老闆出糧畀佢，既然是一次性的費用，那些演藝人士都唔敢取笑請他們表演的人，點解長年收人工伙記又會取笑老闆咁大膽，不過或者唔係大膽，而係蠢。
但有人唔明白，既然演藝界人士咁識做，但點解在一次頒獎典禮取笑香港政府，現在有可能被取消資助，其實都是一樣，資助對於演藝界人士是一份長工，政府就是老闆，取笑老闆是很正常，但如果資助是一次性，我相信唔會出現這個情況，其實，玩吓政府唔係唔可以，不過在玩之餘亦要讚吓政府，做吓補底，咁就萬無一失。
