樓市下跌，不少冇樓的人立刻變成專家，近日有投資者因頭寸稍為緊絀，要賣一層樓解困，有人同我講，那位投資者不識時務，夠膽同誠哥接貨，一定輸死佢，條友意思是否叫人唔好幫襯誠哥買樓，
難道佢唔知道誠哥是地產商，咁樣講好似讚誠哥，其實是倒誠哥米。
現在評論樓市，尤其是大大聲話樓市下跌的人，大多數沒有樓，他們並不是曾經有過物業，現在已經賣走，狠狠地賺了一大筆，而是從來沒有物業，樓市上升，那些人聲都唔聲，或者叫政府出招打壓樓市，而政府亦怕了那些人，出招十年，樓價仍然壓不下去，但就令到香港財政陷入困境，連賣地都冇人吼，仲話係短暫現象，講都冇人信，當日叫政府出招的人又聲都唔聲，彷彿叫政府出招的不是他們。
任何做父母最頭痛的就是子女已經唔好，令自己非常頭痛，旁人仲教他怎樣教子女，如果那些人子女讀書唔錯就無話可說，就算讀得唔好都可以說是經驗之談，但如果教他教子女的人沒有子女，咁樣就好㷫，不過，冇子女的人唔會咁樣做，否則會被人反問連子女都冇，又點樣教我教子女。
現在話被迫賣樓的人是財困其實是不對，如果真真正正是財困，就連樓都冇得賣，賣樓只不過是借貸比率高於金管局要求，唔可以說是財困，因為未賣的物業還有很多，如果那些冇樓專家知道現在賣樓的人仍然持有咁多物業，會不會話他們唔識得投資，其實，冇樓的人應該學冇仔的人一樣，千祈唔好教人教仔。
