在施政報告前，有老友打算偷步買樓，佢知道市場上有245銀主盤，而準銀主盤可能有幾十倍，於是搵物業代理了解下那些銀主盤，如果啱價，可以用子女名義買返一兩個單位，但已經進行了幾個月，莫
講話討價還價，甚至連一個銀主盤都未睇過，唔通物業代理唔使食飯，又話冇生意，應該積極推銷那些銀主盤，而銀主收了那些物業返嚟，點解唔賣，實在令人費解。
我問老友在結婚之前有冇試過訂婚，佢話試過，簡直笨到無可再笨，在訂婚之後，被女方管實晒，不但晨昏定省，連財政都管，但最慘就是有結婚之名，而無結婚之實，後來女方認識了一位歸僑，將他飛甩了，最後埋單計數，兩年用了不少錢，慳慳地可以夠畀一個細單位首期，以後唔敢再提訂婚，就算有女仔要求，打死都唔制，一係結，一係唔結，訂婚免問。
我講有很多人唔會相信，現在的銀主盤其實是訂婚盤，銀主是不會在現階段出售，將物業變成銀主盤的主要目的是其他人不能染指，就算原業主出售都要問過銀主，不過，原業主仍然可以住在已變成銀主盤的單位，我曾經聽過有被收樓的人大讚銀主，仍然讓他們住在那個單位，又唔向他們追債，甚至連利息都唔追，那些人不知道，原因是他們被沒收的單位仍然有大把水位，銀主太早出售，就會有很多款項退回給原業主，既然原業主願意付高息，不如讓他們繼續住在那個單位，一年後才賣，就可以揸乾揸淨銀主盤的水位，在出售之後，原業主可能仍然欠些少錢，銀主有可能做一次好人，大筆一揮，免了原業主的債務，到了最後，原業主唔見了那個單位，但仍然會千多萬謝那位沒收物業的銀主，話佢大仁大義，而事實上銀主盤如果冇水位，銀主一早賣了。
