昨日早上去茶餐廳食早餐，有客人話香港政府打算用大排檔搞活夜經濟，容許多處地點開夜攤，老闆話有效至奇，如果容許開大排檔，食肆更加難做，將會有更加多食肆執笠，畫虎不成反類犬，千祈唔好諗住用
大排檔搞活夜經濟。
如果要搞活夜經濟，首先要搞好治安，國內用了很長時間搞好夜市治安，現在就算幾個女仔去食宵夜，都唔使擔心畀人騷擾，記得大約一年前，在唐山市，有地膽騷擾幾位食宵夜女仔，最後那些人要坐幾年監。
香港在這方面做得不錯，但是在交通方面的確很差，外來遊客就不用說，一般香港人去食宵夜或者去酒吧蒲，自己一定唔會揸車，但當他們離開的時候，想搵架的士都難，大多數都冚旗搵客劏，最後隨時幾個人的交通費貴過宵夜費用，以後即使有人請都會耍手擰頭，就算大排檔幾平都冇用，冇人願意出街食宵夜，又點可以搞活夜經濟。
我相信香港是少數坐的士仍然要支付現金的地方，甚至連八達通都唔可以用，理由大家都明白，因為用了八達通，就有證據的士濫收車資，收現金當然死無對證，政府連要求的士可以用電子支付都做唔到，又點可以搞活夜經濟，有人話晚上的士生意不好，以現在收費，將不會有人願意揸的士，既然如此，何不分段收費，夜間收費比日間高，大多數城市都有這個制度，又不是不能夠執行，不過，政府擔心業界反對而遲遲不作出修正，唔做唔錯就是做官宗旨。
過海隧道即將分段收費，如果想搞活夜經濟，政府何不考慮在晚上十點至翌日凌晨六點免除所有收費，增加市民出街意慾，就算由港島去沙田食宵夜，或者由新界去蘭桂坊夜蒲都冇問題，多了人出夜街，自然可以搞活夜經濟，大排檔就好似小米加步槍，如果現在用小米加步槍打仗，想贏都難，用大排檔搞活夜經濟，最後都是失敗收場。
