有人同我講，剛剛有一個納米樓成交，業主要大幅蝕讓五成，樓市冇運行，我話當日那個納米樓賣出的時候，我又唔見到整體樓價為此而上升，今日賣走的時候又點會有影響，基本上納米樓不是一個住宅單位，只可以說是一間劏房，無論成交價如何，對樓市都沒有影響，反而可以說連劏房都可以賣得出，樓市並不是太差。
在納米樓剛推出時，我本來打算寫一兩篇文章提醒大家，但後來發覺唔需要，因為有買家同我講，只要一個車位
價錢，就可以買到一個單位，去邊度搵，他覺得非常抵，既然納米樓買家覺得抵，我講什麼都是多餘，而事實上我亦不需要講什麼，當那些業主住過納米樓，發覺好似坐監一樣，想賣又賣唔走，或者好似剛剛賣了納米樓的業主，要蝕五成才可以賣走，正是醉過方知酒濃，以後叫他們買納米樓都會耍手擰頭，所以，地產商都唔再起納米樓。
大家以為那些納米樓業主好慘，其實有業主比他們重慘，現在最差個案只不過是蝕了五成，但如果買商場劏舖，隨時可以蝕足九成，蝕五成已經是好叻，所以，今次那位蝕了五成的納米樓業主不要傷心，他其實已經叻過好多人。
納米樓與商場劏舖的業主有一個共通點，就是在他們未買之前點勸都冇用，納米樓業主會話以一個車位價錢，可以買一個單位，而商場劏舖的業主則會話一個車位價錢買一間舖，去邊度搵，不過又不用勸他們，只要他們試過，就唔會有下一次。至於納米樓大跌，對樓市有冇影響，我認為跌了九成的商場劏舖對樓市都沒有影響，只是跌了五成的納米樓對樓市又點會有影響。
